Ўзбекистонда фьючерс савдосини жорий этишнинг амалий босқичи бошланди
“Ўзбекистон Республика товар-хом ашё биржаси” АЖ ва Сингапурнинг “Phillip Capital” компанияси ўртасида фьючерс савдосини ривожлантириш, замонавий товар дериватив инструментларини жорий этиш ҳамда мамлакат биржа инфратузилмасини жаҳон товар бозорлари билан интеграция қилишга қаратилган ҳамкорлик меморандуми имзоланди.
Бу ҳақда жамият ахборот хизмати раҳбари Ҳикматулло Тиллабоев қуйидагиларини маълум қилди:
–Мазкур ҳужжат мамлакатимизда замонавий фьючерс бозорини шакллантириш бўйича олиб борилаётган ислоҳотларнинг навбатдаги муҳим босқичини бошлаб берди. Ташаббус миллий иқтисодиётни глобал деривативлар бозори билан боғлаш, биржа тизимини янги босқичга олиб чиқиш ва халқаро тажрибани амалиётга татбиқ этиш йўлини очади.
Эътиборлиси, мамлакатимизда фьючерс савдосини йўлга қўйиш бўйича ишлар амалий босқичга ўтмоқда. Шу мақсадда товар фьючерслари ва бошқа дериватив инструментлар бозорини ташкил этиш учун “UZEX Global” қўшма корхонаси ташкил этилди. Ушбу тузилма миллий деривативлар бозорининг асосий институционал платформаси сифатида фаолият юритиб, фьючерс контрактлари савдосини ташкил этиш, клиринг жараёнларини йўлга қўйиш ҳамда рискларни бошқариш механизмларини жорий этишда муҳим ўрин тутади.
Ҳамкорликнинг яна бир муҳим жиҳати шундаки, лойиҳани амалга оширишда Сингапурнинг илғор тажрибасига таянилмоқда. Бугунги кунда Сингапур дунёнинг етакчи молиявий ва савдо марказларидан бири ҳисобланади. У ерда шаклланган деривативлар бозори инфратузилмаси, клиринг тизимлари, рискларни бошқариш амалиёти ҳамда биржа операцияларини ташкил этиш механизмлари халқаро миқёсда энг самарали моделлардан бири сифатида эътироф этилади.
“Phillip Capital” компанияси кўп йиллик халқаро тажрибага эга бўлиб, жаҳоннинг етакчи биржалари ва деривативлар бозорларида фаол иштирок этиб келмоқда. Компаниянинг эксперт салоҳияти ва замонавий технологик ечимлари Ўзбекистонда халқаро стандартларга жавоб берадиган, шаффоф ва рақобатбардош фьючерс бозорини шакллантиришга хизмат қилиши кутилмоқда.
Лойиҳанинг амалга оширилиши маҳаллий ишлаб чиқарувчилар, экспортёрлар, импортёрлар ва инвесторлар учун янги имкониятлар яратади. Хусусан, улар нарх хавфларини хеджирлаш, бозордаги кескин ўзгаришлар таъсирини камайтириш ҳамда замонавий молиявий инструментлардан самарали фойдаланиш имкониятига эга бўлади. Бу эса иқтисодиётнинг реал сектори барқарорлиги ва самарадорлигини ошириш, инвестициявий жозибадорликни кучайтириш ҳамда мамлакатимизда бозор механизмларини янада такомиллаштиришга хизмат қилади.
Н.Зиёдуллаева, ЎзА
