Ўзбекистон ва Бельгия: савдо-иқтисодий ва инвестициявий ҳамкорлик фаоллаштирилади
Олий Мажлис Сенати Раисининг биринчи ўринбосари Содиқ Сафоев Бельгия Қироллигининг Ўзбекистондаги Фавқулодда ва мухтор элчиси Матиас Кенде билан учрашди.
Унда Ўзбекистон ва Бельгия ўртасидаги муносабатларнинг бугунги ҳолати ҳамда парламентлараро ҳамкорликни янада ривожлантириш истиқболлари муҳокама қилинди.
Эришилган келишувларнинг ўз вақтида ва сифатли ижросини таъминлашда парламентларнинг ўрни муҳим экани алоҳида қайд этилди. Парламентлараро муносабатларни кенгайтириш, ҳамкорлик бўйича гуруҳлар ва парламент қўмиталари ўртасидаги алоқаларни фаоллаштириш масалаларига эътибор қаратилди.
Учрашувда савдо-иқтисодий ва инвестициявий ҳамкорликни фаоллаштириш масалаларига алоҳида эътибор қаратилди. Хусусан, Бельгия компанияларининг Ўзбекистон бозоридаги иштирокини кенгайтириш, технологиялар трансфери ва мутахассислар тайёрлашни назарда тутувчи саноат кооперациясини ривожлантириш муҳимлиги қайд этилди.
Н.Абдураимова, ЎзА
