Осиё чемпионатида зафар қучган оғир атлетикачиларимиз кутиб олинди
Бугун, 19 май куни Ҳиндистоннинг Гандинагар шаҳрида поёнига етган Осиё чемпионатида Ватанимиз спорт шарафини муносиб ҳимоя қилган оғир атлетикачиларимиз пойтахтимиздаги Ислом Каримов номидаги Тошкент халқаро аэропортида тантанали кутиб олинди.
Осиё қитъасининг 28 мамлакатидан 178 нафар энг кучли оғир атлетикачилари иштирок этган мусобақаларда Жўрабек Зоиров ва Аброр Тожимирзаев мураббийлигидаги Ўзбекистон терма жамоаси аъзолари 1 та олтин, 4 та кумуш ва 1 та бронза, жами 6 та медаль билан умумжамоада 3-ўринни эгаллади.
Кутиб олиш маросимида иштирок этган спорт вазири ўринбосари Ш.Маҳмудов, Ўзбекистон оғир атлетика федерацияси раиси ўринбосари Раҳмон Холмирзаев, мураббий ва мутахассислар, кенг жамоатчилик вакиллари, катталар ўртасидаги чемпионатда бир гуруҳ ёшларимизнинг иштирок этгани, хусусан Амир Абдуллаев, Сарвар Зафаржонов, Муҳаммадқодир Тоштемиров, Абдулазиз Алимжоновнинг совринли ўринларга эгалик қилгани эътиборли эканини таъкидлади. Бу, жорий йил сентябрь-октябрь ойларида Япониянинг Аичи-Нагоя шаҳрида ташкил этиладиган XX ёзги Осиё ўйинларига оғир атлетикачиларимизнинг тизимли тайёргарлигидан далолат эканлиги айтиб ўтилди.
Т.Рўзиев,
ЎзА
