Ўрмонлар доимий эътибор ва ҳимояга муҳтож (+видео)
Маълумки, охирги йилларда бутун дунёда иқлим ўзгаришлари натижасида қурғоқчилик даражасининг ортиб бориши кузатилмоқда ва шу туфайли ўрмонларда ёнғинлар келиб чиқиши ҳамда дарахтларнинг касалланиши ва зараркунандалар хавфи янада ошиб бормоқда.
Шу боис, 2025 йилда ёнғинларнинг олдини олиш мақсадида ўрмон хўжаликларида 160км.дан ортиқ оралиқ жойлар, ўт ўчирувчи машиналар ҳаракатланиши учун 270 км.дан зиёд махсус йўллар, 190 км.дан зиёд ёнғинга қарши ҳимоя чизиқлари, қарийб 80 км.да зовурлар ҳамда 14 минг кубометр махсус сув ҳавзалари барпо этилди. 10 мингдан ортиқ ёнғинга қарши бирламчи ускуналар шай ҳолатга келтирилди.
Шундай бўлсада ўтган йили 29 та жойда ўрмон ёнғинлари содир бўлиб, уларнинг 16 таси Бўстонлиқ туманига тўғри келди. Бу кўпинча табиат қўйнида дам олувчиларнинг эҳтиётсизлиги туфайли содир бўлмоқда.
Бу йил ҳам ёғингарчилик мўл бўлди. Натижада ўт-ўланлар баланд ўсган. Агар улар қурийдиган бўлса ёнғин хавфи ортади ва уни бартараф этиш катта куч талаб этади. Бу борада профилактик чора-тадбирларни кучайтириш ва аҳоли ўртасида кенг тушунтиришлар олиб бориш ҳам энг самарали усул ҳисобланади.
Экология ва иқлим ўзгариши миллий қўмитаси ҳузуридаги Ўрмон агентлиги томонидан Тошкент вилоятининг Бекобод туманида ўтказилган ўқув-амалий семинарда 2025 йилда ёнғин ва ўрмон фонди ерларида зараркунанда ва касалликларга қарши кураш бўйича қилинган ишлар ва келгусидаги вазифалар юзасидан журналистларга маълумот берилди.
Тадбирда Ўрмон агентлиги масъуллари, Сирдарё ва Тошкент вилояти ўрмон хўжалиги мутахассислари, Ўсимликлар карантини ва ҳимояси агентлиги ҳамда туман фавқулодда вазиятлар бўлими ходимлари, оммавий ахборот воситалари вакиллари иштирок этди.
Таъкидландики, 2025 йилда жойларда дарахтларда касаллик ва зараркунандаларни эрта аниқлаш мақсадида 100 мингдан ортиқ гектарда ўрганиш ишлари олиб борилган. Жумладан, 80 минг гектардан зиёд ҳудудда касаллик ва зараркунандаларга қарши кимёвий усуллар билан курашиш ишлари амалга оширилган.
Ўрмон хўжаликларига янги 12та экскаватор,15та трактор, 15та культиватор, 10 та сув ташувчи автомашиналар топширилди. Шунингдек, ёнғинларни ўз вақтида бартараф этишда қўл келадиган 250 та мотопомпа, 200 та моторли ҳамда 250 та механик сув пуркагич каби жиҳозлар берилди. Семинарда ўрмонзорларда касаллик ва зараркунандаларга қарши курашда кўпроқ биопрепаратлардан фойдаланиш тавсия этилди.
- Бу семинардан кўзланган мақсад мана шу жойга ташриф буюрган соҳа мутахассислари ҳар бири ўз ҳудудига борганида ўрмон ёнғинлари ва касалликларга қарши курашда нима иш қилиш керак? Қандай тартибда ишлаш керак? Ёки бўлмаса зараркунандаларга қарши кураш чораларини қачон ва қайси пайтда олиб бориш керак? Ушбу йўналишларни гаплашиб олиш учун “Бекобод ўрмон хўжалиги”да ўқув-амалий семинар ташкил қилдик, - дейди Ўрмон агентлиги бош мутахассиси Давронбек Равшанов.
Тадбир давомида ўрмон ҳудудларида содир бўладиган ёнғинларни бартараф этиш, ҳудудларда мавжуд дарахт ва буталарни касаллик ва зараркунандалардан ҳимоя қилиш, тезкор ахборот алмашинуви ва бошқарувни ташкил этиш бўйича амалий кўргазма ташкил этилди.
Таъкидлаш жоизки, бу борада амалга оширилаётган ишлар республикада иқлим ўзгаришлари оқибатларини юмшатиш, чўлланишнинг олдини олиш, дарахтларнинг касаллик ва зараркунандаларига қарши самарали курашиш ҳамда ўрмонларда ёнғинлар хавфини камайтиришга хизмат қилади.
<iframe width="640" height="420" src="https://www.youtube.com/embed/5f1yPtoO0p8" title="O‘rmonlar doimiy e’tibor va himoyaga muhtoj" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов, Ойбек Давронов, Улуғбек Тўхтаев (видео), ЎзА
