Кўчмас мулк объектларига бўлган ҳуқуқларни эътироф этишга тўсқинлик қилувчи омиллар бартараф этилади
Сенат ялпи мажлисида “Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги қонун кўриб чиқилди.
Қонун бўйича маъруза қилган Сенатнинг Бюджет ва иқтисодий масалалар қўмитаси раиси Эркин Гадоев кейинги йилларда аҳолининг уй-жойга бўлган ҳуқуқларини рўёбга чиқариш учун шарт-шароитлар яратилганини таъкидлади. Жисмоний ва юридик шахслар томонидан қурилган кўчмас мулк объектларига бўлган ҳуқуқларни эътироф этиш бўйича тизимли ишлар амалга оширилмоқда.
Шу билан бирга, ўзбошимчалик билан эгаллаб олинган ер участкалари ҳамда уларда қурилган бинолар ва иншоотларга нисбатан ҳуқуқларни эътироф этиш ишларини янада жадаллаштириш, ваколатли ташкилотларнинг масъулиятини ошириш, ҳуқуқни эътироф этиш билан боғлиқ айрим механизмларни соддалаштириш, фуқаролар учун қўшимча қулайликлар яратиш зарурати юзага келмоқда.
Мазкур қонун билан “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги ҳамда “Кўчмас мулкка бўлган ҳуқуқларни давлат рўйхатидан ўтказиш тўғрисида”ги қонунларга ҳуқуқларни эътироф этиш билан боғлиқ бўлган ҳужжатларни кўриб чиқиш муддатларини қисқартиришга ҳамда ҳуқуқларни эътироф этиш ишлари билан боғлиқ шикоятларни кўриб чиқиш жараёнларини такомиллаштиришга қаратилган ўзгартириш ва қўшимчалар киритилмоқда.
Фуқаролар учун қўшимча қулайликлар яратиш мақсадида солиқ қарздорлиги тушунчаси аниқлаштирилиб, ер участкасига бўлган ижара ҳуқуқини эътироф этиш учун бир марталик тўловни бўлиб-бўлиб тўлаш тартиби ва шартлари жорий этилмоқда.
Сенаторлар маъқуллаган қонун билан киритилаётган нормалар жисмоний ва юридик шахсларнинг кўчмас мулк объектларига бўлган ҳуқуқларини эътироф этишга тўсқинлик қилувчи омилларни бартараф этишга хизмат қилади.
Н.Абдураимова, ЎзА
