Олтин тусдаги воҳа
Хоразм заминига кузнинг олтинранг нафаси кириб келди. Бу фасл табиатга ўзгача жозиба бағишлаб, воҳанинг таниш манзараларини ранг-баранг тусларга буркамади. Дарахтлар баргларининг сарғайиши, қуёш нурларида товланаётган далалар, боғлар ва сокин йўллар кузнинг бетакрор гўзаллигини намоён этмоқда.
Кузнинг ҳар бир манзарасида ўзига хос нафосат мужассам. Дарахт шохларидаги зарҳал барглар майин шабадада тебранар, қуёшнинг илиқ нурлари эса атрофга янада файз бағишлайди. Воҳанинг кенг далалари, мевали боғлари ва узумзорлари бу фаслда алоҳида кўрк касб этиб, табиатнинг рангин жилоларини намоён этади. Олтин тусга кирган манзаралар, узоқларга туташган йўллар ва осойишта қишлоқ кўринишлари инсон қалбида завқ ва хотиржамлик уйғотади.
Хоразмда куз нафақат табиатнинг гўзал манзаралари, балки меҳнат ва барака фасли ҳамдир. Деҳқонлар йил давомидаги машаққатли меҳнат самарасини йиғиб-териб олмоқда. Дала ва боғларда ҳосил йиғиштириш ишлари қизғин давом этаётган бир пайтда, хонадонларда ҳам қиш мавсумига тайёргарлик кўрилмоқда. Бу жараёнлар кузнинг нафақат нафосат, балки тўкинлик ва файз-барокат тимсоли эканини яна бир бор намоён этади.
Воҳанинг кузги манзараларида табиат ва инсон меҳнатининг уйғунлиги яққол кўзга ташланади. Сарғайган барглар орасидан сизиб тушаётган қуёш нурлари, мусаффо ҳаво ва сокин атроф кишига ўзгача кайфият бағишлайди. Кунлар салқинлашиб, табиат қишга ҳозирлик кўраётган шу дамларда Хоразмнинг бетакрор қиёфаси янада ёрқин намоён бўлади.
[gallery-31957]
Олтинранг тусга бурканган Хоразм манзаралари она диёримизнинг табиий гўзаллигини, воҳа ҳаётининг ўзига хослигини ва кузнинг дилларга яқин нафосатини акс эттиради.
Беҳзод САИДОВ (сурат), ЎзА
