Москва ва Пекин Эронни санкциялар зарбасидан тўсди (+видео)
Россия ва Хитой БМТ Хавфсизлик Кенгашида Эронга қарши санкциялар мониторингини давом эттиришга қаратилган АҚШ резолюцияси лойиҳасига вето қўйди. Шу тариқа Москва ва Пекин Ғарбнинг БМТ экспертлари гуруҳи ваколатини узайтириш ташаббусини тўхтатди, деб хабар қилди TRT канали
Овоз бериш жараёнида ҳужжатни Кенгашнинг 11 аъзоси қўллаб-қувватлади, Сомали ва Покистон вакиллари бетараф қолди. Бироқ Хавфсизлик Кенгашининг икки доимий аъзоси — Россия ва Хитойнинг қатъий позицияси туфайли резолюция қабул қилинмади.
Россиянинг БМТдаги доимий вакили Василий Небензя санкцияларнинг қайта тикланишини ноқонуний деб атади. Унинг таъкидлашича, АҚШ томонидан тайёрланган резолюция лойиҳасининг ҳам ҳуқуқий асоси мавжуд эмас.
Ўз навбатида, Эроннинг БМТдаги вакили Москва ва Пекинга миннатдорлик билдирди. АҚШнинг БМТдаги вакили ўринбосари Женнифер Лосетта эса вето қўйган давлатларни Теҳрон билан тақиқланган ҳамкорлигини яширишга уринаётганликда айблади.
Шу билан бирга, Вашингтон Эронга нисбатан иқтисодий босимни кучайтирди. АҚШ ҳукумати молиявий чекловларни криптовалюта тармоқлари орқали четлаб ўтишда Эронга ёрдам бергани айтилган банк ва компанияларни санкциялар рўйхатига киритди.
Кенжа Бекжонов,Анвар Ахмедов. ЎзА
