Миллий спортимиз кураш Марказий Америкада ривожланмоқда
Шу кунларда Доминикан Республикаси пойтахти Санто Доминго шаҳрида океан орти мамлакатларининг “кичик олимпиадаси” саналган XXV Марказий Америка ва Кариб денгизи ўйинлари ўтказилмоқда. Ўйинлар дастуридан 18 та спорт тури жой олган.
Ёзги Олимпия ўйинларининг Марказий Америкадаги муҳим бўғини ҳисобланган мазкур мусобақалар доирасида миллий спортимиз кураш бўйича ёшлар, ўсмирлар ва катталар ўртасида Панамерика чемпионати ташкил этилди.
Чемпионат давомида Халқаро кураш ассоциацияси президенти вазифасини бажарувчи Зиёвиддин Ҳожиниёзов Марказий Америка ва Кариб денгизи спорт ташкилоти – Centro Caribe Sports президенти Луис Межиа Овиедо билан учрашув ўтказди.
Айтиш лозим, 1924 йилда ташкил этилган Centro Caribe Sports Марказий Америка ва Кариб денгизи минтақасидаги 35 та мамлакат Миллий олимпия қўмиталарини бирлаштирган спорт ташкилоти бўлиб, Халқаро олимпия қўмитасининг минтақадаги бошқарув органи ҳисобланади.
Марказий Америка ва Кариб денгизи ўйинлари илк бор 1926 йили ташкил этилган бўлиб, ушбу мусобақалар дунёдаги энг қадимий минтақавий комплекс спорт ўйинларидан бири.
Панамерика Кураш иттифоқи президенти Жаиме Касанова, Ўзбекистон кураш федерацияси раисининг биринчи ўринбосари Бахтиёр Қодиров иштирокида ўтказилган учрашувда Луис Межиа Овиедо Панамерика чемпионати ва унинг доирасида ташкил этилган халқаро семинарлар курашнинг комплекс спорт ўйинлари дастуридан ўрин олиш салоҳиятини яққол намоён этганини қайд этди.
Музокаралар жараёнида курашнинг 2030 йилги Марказий Америка ва Кариб денгизи ўйинлари - “кичик олимпиада” дастуридан ўрин олиш имконияти хусусида сўз юритилди.
Учрашувда ҳамкорлик алоқаларини мустаҳкамлаш ҳамда курашнинг комплекс ўйинлар дастуридан ўрин эгаллашига қаратилган қўшма ташаббусларни изчил давом эттириш ташаббуслари илгари сурилди.
Қитъанинг ўндан ортиқ давлатлари иштирок этган Панамерика чемпионатида Доминикан Республикаси терма жамоаси 16 та олтин, 10 та кумуш ва 4 та бронза медалини қўлга киритиб, умумжамоа ҳисобида 1-ўринни, Коста-Рика терма жамоаси 2 та олтин, 2 та кумуш ва 5 та бронза медаль билан иккинчи, Колумбия эса 1 та олтин, 1 та кумуш ва 1 та бронза медаль билан учинчи ўринни эгаллади.
Шунингдек, Гаити, Мексика, Перу ва Венесуэла вакиллари ҳам совриндорлар сафидан жой олди.
Марказий Америка ва Кариб денгизи ўйинлари 8 августга қадар давом этади.
Т.Рўзиев,
ЎзА
