Кремль Россиянинг тинчлик бўйича муносабатини баён қилди
– Биз келажак авлод учун узоқ муддатли тинчликни хоҳлаймиз, – деди Россия Президенти матбуот котиби Дмитрий Песков NBC телеканалига берган интервьюсида.
Кремль вакили Москвага сулҳ эмас, балки можарога тўлиқ чек қўйиш кераклигини таъкидлади.
Ўтган ҳафта Ослода Украина етакчиси Владимир Зеленский, Финляндия Президенти Александр Стубб, Норвегия Бош вазири Ёнас Гар Стёре ва АҚШ раҳбари Дональд Трампнинг махсус вакили Стивен Уиткофф иштирокида музокара бўлиб ўтган эди.
Эртасига америкалик музокарачи Санкт-Петербургга бориб, Владимир Путин қабулига кирди. Президент Уиткоффга Россия АҚШ ва Украина иштирокидаги уч томонлама маслаҳатлашувни тиклашга тайёрлиги ҳақида маълумот берди. Учрашув ноябрь ойи биринчи ярмида Бирлашган Араб Амирликларида ўтиши мумкинлиги таъкидланди.
Сешанба куни эса РФ етакчиси Стубб ва Стёре билан телефон орқали тинчлик жараёнини муҳокама қилди. Путин узоқ муддатли келишувга фақат Москванинг қонуний манфаати тўлиқ инобатга олинган ҳолда эришиш мумкинлигини таъкидлади. Шунингдек, “Европа Иттифоқи ва НАТО мамлакатларининг қарама-қаршилик сиёсати”га эътибор қаратди ва айнан шундай ёндашув ҳарбий ҳаракат узайишига олиб келаётганини таъкидлади.
С.Раҳимов, ЎзА
