“Жаҳон чемпионати – 2026”: Бразилия олтинчи чемпионлигини қўлга қирита оладими?
Жорий йилги футбол бўйича Жаҳон чемпионатига АҚШ, Канада ва Мексика давлатлари мезбонлик қилади. Дунё футбол ихлосмандлари томонидан узоқ кутилаётган мундиал қай даражада ташкил этилишига қизиқиш кун сайин ортиб бормоқда.
Футбол оламининг энг нуфузли тадбирларидан бири бўлган ушбу чемпионатда илк бор дунёнинг 48 та терма жамоаси иштирок этади. Анъанага содиқ ҳолда мундиалга йўл олган жамоаларнинг саралаш босқичидаги иштирокини ёдга оламиз.
Бу сафар эътиборимиз “C” гуруҳи иштирокчилари — Бразилия, Марокаш, Гаити ва Шотландия терма жамоаларига қаратилди.
Дастлаб, жаҳон футболида ўзининг машҳур ва маҳоратли футболчилари билан танилган Бразилия терма жамоасининг мундиал сари босиб ўтган йўли ҳақида тўхталамиз. Жамоа КОНМЕБОЛ минтақавий саралаш босқичида иштирок этди. Ушбу саралаш 2023 йил 7 сентябрдан 2025 йил 9 сентябрга қадар давом этди. Жамоалар 18 тур давомида Жаҳон чемпионати йўлланмаси учун кураш олиб борди.
Бразилия саралашда 8 та ғалаба, 4 та мағлубият ва 6 та дуранг қайд этиб, 28 очко билан 5-ўринни эгаллаган ҳолда Жаҳон чемпионатига йўл олди. Шуни таъкидлаш жоизки, 1930 йилдан бери мунтазам мундиалда иштирок этиб келаётган Бразилия 2002 йилдан буён Жаҳон чемпионатида бош совринни қўлга кирита олмаяпти.
Мазкур гуруҳдан ўрин олган Америка қитъасининг яна бир вакили Гаити терма жамоаси КОНКАКАФ саралаши доирасида иккинчи босқичдан иштирокини бошлади. Унда Гаити терма жамоаси “C” гуруҳида 9 очко билан иккинчи ўринни эгаллаб, 1974 йилдан буён илк бор мундиал йўлланмасини қўлга киритди.
Гуруҳнинг яна бир кучли жамоаларидан бири — Марокаш эса Африка қитъасидаги саралаш босқичининг “E” гуруҳида иштирок этди. 2023 йилдан бошланган гуруҳ баҳсларида марокашлик футболчилар барча 8 учрашувда ғалаба қозониб, 24 очко билан Жаҳон чемпионати йўлланмасини расман қўлга киритди. Шуни алоҳида таъкидлаш жоизки, Марокаш "ЖЧ–2022" мусобақасида 4-ўринни эгаллаган бўлиб, бу сафар ҳам совринли ўринлар учун асосий даъвогарлардан бири сифатида кўрилмоқда.
Энди гуруҳнинг тўртинчи вакили - Шотландия термаси ҳақида. Жамоа Европа қитъасидаги саралаш баҳсларининг “C” гуруҳида Дания, Греция ва Беларусь термаларига қарши баҳс олиб борди. 6 ўйинда 13 очко жамғарган шотландияликлар гуруҳда биринчи ўринни эгаллаб, Жаҳон чемпионати йўлланмасини қўлга киритди.
Маълумот учун, “C” гуруҳидан ўрин олган жамоалар иштирокидаги учрашувлар 13–24 июнь кунлари бўлиб ўтади:
13 июнь: Бразилия — Марокаш
Стадион: “MetLife”
Гаити — Шотландия
Стадион: “Gillette”
19 июнь: Шотландия — Марокаш
Стадион: “Gillette”
Бразилия — Гаити
Стадион: “Lincoln Financial Field”
24 июнь: Шотландия — Бразилия
Стадион: “Hard Rock”
Марокаш — Гаити
Стадион: “Mercedes-Benz”
Жавоҳир Тошхўжаев,
ЎзА
