Экспортчи корхонага божхонадан амалий кўмак
Бухоро вилоятида тадбиркорликни қўллаб-қувватлаш, экспорт салоҳиятини ошириш ва ишлаб чиқарувчилар учун қулай шарт-шароитлар яратиш борасида амалий ишлар изчил давом этмоқда. Бу йўналишда давлат органлари ва хусусий сектор ўртасидаги самарали ҳамкорлик иқтисодий тараққиётнинг муҳим омилига айланмоқда.
Ана шундай саъй-ҳаракатларнинг яна бир амалий намунаси сифатида Бухоро вилояти божхона бошқармаси бошлиғи Б. Муратов томонидан Қоракўл кичик саноат зонасида фаолият юритаётган “MGM TEKS BUKHARA” масъулияти чекланган жамиятида сайёр ўрганиш ташкил этилди.
Мазкур корхона жорий йилда ўз фаолиятини бошлаган бўлиб, хориждан импорт қилинаётган ип-калавани қайта ишлаш орқали қурилиш соҳасида кенг қўлланиладиган ишчи қўлқоплар ишлаб чиқариш ва уларни ташқи бозорларга экспорт қилишга ихтисослашган. Қисқа вақт ичида корхона ўзининг юқори ишлаб чиқариш салоҳияти ва экспортбоп маҳсулотлари билан иқтисодий фаолликнинг муҳим иштирокчисига айланишга улгурди.
Тадбиркорлик субъекти вакиллари томонидан ишлаб чиқариш ҳажмини янада кенгайтириш ҳамда импорт қилинаётган хомашёни “божхона ҳудудида қайта ишлаш” божхона режими асосида расмийлаштириш бўйича амалий ёрдам сўралди. Мурожаатни ижобий ҳал этиш мақсадида божхона раҳбарияти ва мутахассислар корхонага бевосита ташриф буюриб, ишлаб чиқариш жараёнлари билан яқиндан танишди.
Ўрганишлар давомида мазкур божхона режими корхона фаолияти учун қанчалик самарали экани атрофлича таҳлил қилинди. Мутахассислар томонидан тадбиркорларга ушбу режимнинг ҳуқуқий асослари, иқтисодий афзалликлари ва амалий тартиб-таомиллари юзасидан батафсил тушунтиришлар берилди.
“Божхона ҳудудида қайта ишлаш” режими импорт қилинаётган хомашёни мамлакат ҳудудида қайта ишлаб, тайёр маҳсулот сифатида экспорт қилиш имконини беради. Бу эса тадбиркор учун бир вақтнинг ўзида бир нечта муҳим устунликларни таъминлайди. Яъни айланма маблағлардан самарали фойдаланиш, ишлаб чиқариш харажатларини қисқартириш, экспорт рақобатбардошлигини ошириш, янги иш ўринлари яратиш, маҳаллий саноат занжирини мустаҳкамлашдан иборат.
Мутахассислар хулосасига кўра, “MGM TEKS BUKHARA” МЧЖнинг мавжуд ишлаб чиқариш жараёнлари ва экспорт йўналиши ушбу режим талабларига тўлиқ мос келади. Бу эса яқин келажакда корхона учун янада кенг имкониятлар яратиши мумкин.
Эътиборлиси, корхонанинг йиллик ишлаб чиқариш қуввати 10 миллион жуфт қўлқопни ташкил этади. Бу кўрсаткич нафақат Қоракўл тумани, балки бутун вилоят саноат салоҳияти учун ҳам муҳим аҳамиятга эга.
Корхона инвестори Юлия Мануйлованинг маълум қилишича, бугунги кунга қадар қарийб 400 минг АҚШ доллари миқдоридаги экспорт операциялари тўлиқ “Экспорт уч қадамда” тизими орқали расмийлаштирилган. Бу эса мамлакатимизда экспорт жараёнларини рақамлаштириш ва соддалаштириш бўйича амалга оширилаётган ислоҳотлар ўз самарасини бераётганини кўрсатади.
Бугунги глобал иқтисодиёт шароитида мамлакат тараққиётини таъминлайдиган асосий омиллардан бири — юқори қўшилган қиймат яратадиган экспортбоп маҳсулотлар ишлаб чиқаришдир. “MGM TEKS BUKHARA” каби корхоналар айнан шу мақсадга хизмат қилиб, импорт хомашёсини юқори қийматли тайёр маҳсулотга айлантирмоқда.
Бу каби ташрифлар эса давлат органларининг назорат қилувчи эмас, балки тадбиркорнинг ишончли ҳамкори сифатида фаолият юритаётганини яна бир бор намоён этмоқда.
Зариф Комилов, ЎзА мухбири
