Дунёни забт этаётган ўзбек ёшлари (+видео)
Ёшлар ҳар бир давлатнинг келажагини, салоҳиятини белгиловчи муҳим ижтимоий қатлам саналади. Зеро, ҳар бир жамиятнинг ҳолати, тақдири ва истиқболи унда яшаётган ёшларнинг салмоғи, маънавияти ва онглилиги даражаси билан белгиланади.
Албатта, ёшлар жамиятнинг эртанги келажаги, унинг фаол аъзоси, таъбир жоиз бўлса жамият эртасининг муносиб ворисларидир.
Хабарингиз бор, Муҳаммад ал-Хоразмий номидаги ихтисослаштирилган мактабнинг ики нафар битирувчиси – Зоҳиджонов Элбек ва Суннатов Асилбек дунёнинг энг нуфузли техник олийгоҳларидан бири саналган Massachusetts Institute of Technology (MIT) университетига 100 фоизлик грант асосида қабул қилинди.
Элбек ва Асилбек бутун Ўзбекистон бўйича MIT университетига тўлиқ грант асосида ўқиш имконини қўлга киритган саноқли ва ноёб иқтидор эгаларидан. QS World University Rankings рейтингига кўра, MIT кетма-кет 13 йилдан буён дунёда 1-ўринни эгаллаб келмоқда. Шунингдек, MIT 100 дан ортиқ Нобель мукофоти совриндорларини етиштирган нуфузли таълим даргоҳи ҳисобланади.
Бугунги лавҳамизда фахримизга айланган Элбек ва Асилбеклар билан яқиндан танишиш имконига эга бўлдик.
Ёшларнинг ўз келажак ҳаёти чизгиларини белгилаб олишида устознинг ўрни беқиёс. Устоз билим улашади, қалбларда маънавият чироғини ёқади, ўғил-қизларимиз кўзлаётган юксак марраларга етиб бориш йўлларини ёритади. Биз ҳам фурсатдан фойдаланиб Элбек ва Асилбекларнинг ушбу тарихий натижага етиб келгунларига қадар ўз оромидан кечиб, ўқувчисининг ютуқларидан бирдек мамнун бўлган ҳурматли устозларини суҳбатга тортдик.
Албатта, мамлакатимизнинг келажаги бўлган иқтидор эгаларини қўллаб-қувватлаш ва уларнинг маҳоратини ошириш йўлидаги барча хайрли ишлар бугунги кунда ўз самарасини бермоқда. Барча соҳалар илм-фан, спорт ва санъат соҳаларида янгидан-янги дунё марраларни забт этаётган ёшларимизнинг натижалари ҳар бир ўзбек фуқаросига ўзгача фахр бағишлайверсин, деб қоламиз..
<iframe width="640" height="420" src="https://www.youtube.com/embed/LwmxTvHvioA" title="Dunyoni zabt etayotgan o`zbek yoshlari" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Муҳайё Турдалиева, Салимжон Обиджонов, ЎзА
