Депутатлар қўлида “яшил карта” билан сайловчилар ҳузурида бўлди
Бугун Олий Мажлис Қонунчилик палатасидаги Ўзбекистон Экологик партияси фракциясининг навбатдаги йиғилиши бўлиб ўтди. Унда бир қатор қонун лойиҳалари кўриб чиқилди.
Йиғилиш аввалида фракция раҳбари Абдушукур Ҳамзаев фракция аъзоларининг шу йил 24-28 март кунлари сайлов округларидаги фаолияти ҳақида тўхталар экан, депутатлар томонидан илк бор “Ташаббусли бюджет” доирасида жойларда ғолиб бўлмаган лойиҳалар орасидан муҳим лойиҳалар танлаб олинганига эътибор қаратди:
– Бу галги учрашувлар ҳар қачонгидан-да натижадорлиги билан ажралиб турди, биз депутатлар қўлимизда “яшил карта” билан ҳудудларга бордик. Давлатимиз раҳбари ташаббуси билан “Ташаббусли бюджет” жараёнида депутатларнинг иштирокига оид жорий қилинган амалиёт жойларда қўлланилган ҳолда кўплаб лойиҳаларга қайта жон киритилди. Жумладан, фракциямиз аъзоларининг ташаббуси билан қарийб жами 26 миллиардга яқин маблағлар муайян лойиҳаларни молиялаштиришга йўналтириладиган бўлди. Бу амалий натижалардан аҳоли вакиллари мамнун бўлиши баробарида биз депутатлар ҳам жуда хурсанд бўлиб қайтдик. Ушбу ташаббус депутатларга нисбатан сайловчиларнинг ишончи янада ортишига сабаб бўлмоқда, – деди А.Ҳамзаев.
Шунингдек, фракция раҳбари 23 март куни Президентимизнинг экология ва атроф-муҳитни муҳофаза қилиш соҳасида 2026-2030 йилларга мўлжалланган устувор умуммиллий лойиҳалар юзасидан тақдимот билан танишиш жараёни ҳақида тўхталиб, бугун экологик ҳуқуқ энг устувор ҳуқуқларимиздан бирига айланганини қайд этди. Бу борада партия олдида турган вазифалар, шу билан бирга, ҳаво сифатини сақлаш бўйича партия ва фракция томонидан амалга оширилаётган, режалаштирилган ишлар тўғрисида сўз юритди.
Йиғилишда “Қурилиш соҳасида давлат назорати ва бошқаруви янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун лойиҳаси муҳокама қилинди.
Таъкидланганидек, қурилиш жараёнида хавфсизлик талабларини янада кучайтириш мақсадида ишлаб чиқилган қонун лойиҳаси билан кўп квартирали уйларни Қурилиш ва уй-жой коммунал хўжалиги соҳасида назорат қилиш инспекцияларининг рухсатномасисиз қуриш учун жавобгарлик кучайтирилмоқда. Фракция аъзолари бир қатор саволларни ўртага ташлади ва тегишли жавоблар олинди.
Муҳтарама Комилова,
ЎзА
