Чемпионат Зоминда ўтказилди

Жиззах вилоятининг Зомин туманида ўсмирлар, ёшлар ва катталар ўртасида Ўзбек жанг санъати бўйича Ўзбекистон чемпионати бўлиб ўтди.

Спорт вазирлиги ҳамда Республика Ўзбек жанг санъати федерациясининг йиллик тақвим режасидан жой олган мазкур мамлакат чемпионатида 1200 нафар спортчи "Темурийлар беллашуви", "Қилич-қалқон", "Камондан ўқ узиш" ҳамда "Найза улоқтириш" йўналишларида ўзаро куч синашишди. 

Зомин туманининг гўзал табиати қўйнида ўтган мусобақанинг дастлабки кун беллашувларида 700 нафарга яқин ўсмир ва ёшлар ҳар бир йўналишда 8 тадан вазн тоифасида ғолиблик учун кураш олиб боришди. 

Қизиқарли ўтган учрашувларнинг биринчи кунида энг муносиб деб топилган ёш атлетлар ғолиб ва совриндорлар қаторидан жой олишди.
Мусобақанинг иккинчи кунида катталар ўртасидаги "Темурийлар беллашуви", "Қилич-қалқон", "Камондан ўқ узиш", "Найза улоқтириш", "От чоптириш", "От устида камондан ўқ узиш", "От устида қовоқ кесиш" йўналишлари бўйича беллашувлар ҳам муросасиз ва шиддатли тарзда давом этди. 

Белгиланган ҳар бир йўналишда ғолибликни қўлга киритган спортчилар шоҳсупага кўтарилиб, диплом ва медаллар билан тақдирланишди. 

Чемпионатнинг якуний натижаларига кўра, умумжамоа ҳисобида фахрли биринчи ўринни Тошкент вилояти жамоаси қўлга киритган бўлса, иккинчи ўринни Андижон жамоаси эгаллади. Иккита учинчи ўрин эса Жиззах ва наманганлик атлетларга насиб этди. 

Н. Раҳмонова, ЎзА