АҚШга Россия дизель ёнилғисини ташиётган танкерлар йўналишни ўзгартирмоқда
АҚШга йўл олган, Россия ёнилғиси ортилган 3 танкердан иккиси йўналишни ўзгартирди. Бу ҳолат Трамп ва Путин ўртасида тузилган келишувни хавф остига қўяди.
“Financial Times” ёзишича, Россиянинг “Talisman” ва Гонконг компаниясига тегишли Серра-Леоне байроғи остидаги “Leruo” танкерлари энди АҚШнинг Атлантика қирғоғини якуний манзил сифатида кўрсатмаяпти.
2 ноябрь куни “Leruo” йўналишни Бразилияга бурди, “Talisman” эса Ўрта ер денгизига кирди ва ҳозир Жазоир қирғоғи яқинида турибди. Танкер “буюртма учун” ишорасини узатмоқда. Яъни, юкнинг тасдиқланган харидори ёки манзил порти йўқ.
Газета таъкидлашича, иккала танкер ҳам Европа Иттифоқи санкциясига дучор бўлган.
Грециянинг “Eastern Mediterranean Maritime” юк ташиш компаниясига тегишли учинчи танкер – “Agioi Fanendes” ҳам АҚШ томон сузишда давом этса-да, йўналиш ўзгариши эҳтимолини билдирадиган “буюртма учун” ишораси билан ҳаракатланяпти.
Рус дизель ёнилғисини жаҳон бозорига етказиб бериш бўйича келишув 9 октябрь куни РФ ва АҚШ Президентлари томонидан тасдиқланган. Шундан сўнг Америка етакчиси Владимир Зеленскийни тинчлик ўрнатишдан бош тортгани ва Россия нефтни қайта ишлаш заводларига ҳужум тўхтатилишини истамагани учун яна танқид қилди. Қолаверса, Москва билан музокара олиб бориш учун Киев раҳбариятида ўзгариш зарурлигига урғу берди.
С.Раҳимов, ЎзА
