АҚШ хорижлик ҳомиладор аёлларнинг мамлакатга киришини тақиқламоқчи
Америка Қўшма Штатлари ҳукумати "туғилиш туризми"га чек қўйиш мақсадида АҚШ фуқароси бўлмаган, ҳомиладорликнинг сўнгги босқичидаги аёлларнинг мамлакатга келишини тақиқлаш масаласини кўриб чиқмоқда.
“Telegraph” газетаси хабар беришича, Оқ уй маъмурияти хорижлик хотин-қизлар фарзандига Америка фуқаролигини олиб бериш мақсадида келишини чеклаш учун янги чораларни ўрганмоқда. Бу ҳақда “SBS News” хабар берган.
Президент Дональд Трамп иккинчи муддат лавозимига киришгандан сўнг АҚШ тупроғида туғилган чақалоқларга бевосита фуқаролик бериш тизимини бекор қилувчи махсус фармонни имзолаган. Мазкур ҳужжат Конституцияга 14-тузатиш билан киритилган ушбу қоида фақат мамлакатда қонуний ва доимий яшаётган ота-оналар фарзандига нисбатан қўлланиши кераклигини ифодалайди. Олий суд ташаббусни тўхтатгач, давлат раҳбари ушбу қарорни “Хитойнинг ғалабаси” деб атади ва Конгрессни қонунчиликни ўзгартиришга чақирди.
Ҳукумат расмийлари фикрича, бундай туризм тури миллий хавфсизликка таҳдиддир. Зеро, хорижлик онадан туғилган бола йиллар ўтиб Америка олий ўқув юртида таҳсил олиш баҳонасида мамлакат интеллектуал мулкини ўғирлаши мумкин.
Маълумотга кўра, Қўшма Штатларда ҳар йили чет эллик ота-онадан ўртача 26 000 бола дунёга келади, Тақиқ айни оқимни тўхтатишга қаратилган.
Ф.Яхшибоева, ЎзА
