3 миллион евро қарз: Эрон самолёти Истанбулда мусодара қилинди
Истанбул аэропортида Эроннинг “Caspian Airlines” авиакомпаниясига тегишли “Boeing-737” самолёти 3 миллион евро атрофидаги қарз сабаб, суд қарори асосида ушлаб қолинди. Йўловчилар парвозга тайёр турган пайт суд ижрочилари учоқ саҳнига кириб, самолётни мусодара қилиш тўғрисида ҳужжат тақдим этган.
Эронга учиши керак бўлган лайнерга парвоз олдидан кредитор “ACM Temsil Gözetim” компанияси вакиллари ҳамда ижрочилар келган. Йўловчилар ва экипаж самолётдан туширилиб, терминалга қайтарилган. 1993 йил Теҳронда ташкил этилган “Caspian Airlines” халқаро йўналишда “Boeing-737” учоқларидан фойдаланади. Жамоадаги молиявий муаммо мамлакат авиациясига нисбатан йиллар давомида амал қилган АҚШ санкцияси, жумладан самолёт, эҳтиёт қисм ва техник хизматга қаратилган чеклов билан ҳам боғлиқ.
Воқеа Ислом Республикаси авиациясига ташқи босим кучайган пайтга тўғри келди. АҚШнинг авиация соҳасига қарши янги иккиламчи санкцияси кучга киргач, Эрон авиакомпанияларининг Ироқ, БАА, Озарбайжон ва Ўмонга айрим рейслари тўхтатилди, қатор хорижий ташувчилар ҳам мамлакатга парвозни бекор қилди. Аввал Теҳрон аэропортидан кунига 80-90 халқаро йўналиш бўйлаб училарди. Санкциядан кейин эса рейс сони 41 тага тушди. Туркия Эрон авиакомпанияларига расман тақиқ қўймагани учун “Caspian Airlines” Истанбулга парвозни давом эттираётган эди.
Мусулмон Зиё, ЎзА
