Зеленский Лотин Америкасидан ёрдам сўради
Украина Президенти Владимир Зеленский Мадридда ўтказилган саммитда Лотин Америкаси давлатлари раҳбарларини мамлакат энергетика тизимини тиклаш учун зарур ускуналар етказиб беришга чақирди. Унинг таъкидлашича, уруш оқибатида Украинадаги барча электр станциялари турли даражада зарар кўрган. Шу боис трансформатор, электр сими, электрон жиҳоз, дизель ва газ генераторига эҳтиёж кучли.
Зеленский ҳамкор давлатлардан зарур воситаларни тезкор етказиш учун маҳаллий ишлаб чиқарувчилар билан бевосита алоқа ўрнатишни сўради. Шунингдек, минтақа мамлакатларини БМТ доирасида Киевни дипломатик қўллаб-қувватлашга чақирди. Украина илк бор иштирок этган 30-Иберо-Америка саммитида асосан испан ва португал тилларида сўзлашувчи 22 давлат вакиллари қатнашди.
Россиянинг Украина энергетика инфратузилмасига сўнгги ҳафталардаги такрорий зарбалари қиш мавсумида электр таъминоти билан боғлиқ муаммо янада кучайиши хавотирини оширмоқда. Киев мэри Виталий Кличко пойтахт энергия захираси билан боғлиқ вазиятни “ўта оғир” дея баҳолаган. Зеленский эса Испания Бош вазири Педро Санчес ва қирол Филипп VI билан учрашувда ҳаво мудофаасини мустаҳкамлаш масаласини ҳам муҳокама қилган.
Мусулмон Зиё, ЎзА
