Өзбекстан мен Италия құрылыс және қала құрылысы бойынша ынтымақтастықты кеңейтеді
Өзбекстан мен Италия арасында құрылыс, сәулет, қала құрылысы және тұрғын үй-коммуналдық шаруашылық салаларындағы ынтымақтастықты кеңейту, заманауи технологияларды енгізу және бірлескен жобаларды жүзеге асыру мәселелері талқыланды.
ӨР Құрылыс және тұрғын үй-коммуналдық шаруашылық министрі Шерзод Хидоятов Италия Республикасының Өзбекстандағы жаңадан тағайындалған Төтенше және Өкілетті елшісі Гвидо де Санктиспен кездесті.
Кездесу басында министр Шерзод Хидоятов елшіні Өзбекстандағы дипломатиялық қызметінің басталуымен құттықтап, жауапты қызметіне табыс тіледі.
Кездесу барысында екі ел арасындағы құрылыс саласындағы ынтымақтастықты одан әрі нығайту, сәулет және қала құрылысы бағыттарында озық тәжірибе алмасу, сондай-ақ тұрғын үй-коммуналдық шаруашылық жүйесін жетілдіруге бағытталған бірлескен жобаларды жүзеге асыру перспективалары талқыланды.
Тараптар өңірлердің тұрақты дамуын қамтамасыз ету, заманауи урбанистика қағидаттарын кеңінен енгізу, энергия үнемдейтін әрі экологиялық құрылыс технологияларын пайдалану, ғимараттардың сейсмикалық төзімділігін арттыру және коммуналдық инфрақұрылымды жаңғырту мәселелеріне ерекше назар аударды.
Сонымен қатар Италияның сәулет және инженерия салаларында жинақтаған озық тәжірибесін зерделеп, оны ел жағдайына бейімдей отырып, тәжірибеге енгізу жөнінде пікір алмасты. Бұл бағытта салалық ұйымдар, ғылыми мекемелер және іскер топтар арасындағы тікелей ынтымақтастықты кеңейту, мамандардың қатысуымен бірлескен семинарлар, біліктілікті арттыру бағдарламалары мен тәжірибелік жобаларды ұйымдастыру мүмкіндіктері де қарастырылды.
Айта кетейік, құрылыс саласына инновациялық тәсілдерді енгізу, заманауи технологияларды тиімді пайдалану және халықаралық тәжірибені кеңінен қолдану елдегі қала құрылысы саясаты мен құрылыс саласының одан әрі дамуына ықпал етеді.
Кездесу соңында тараптар белгіленген бағыттар бойынша жұмыс байланыстарын жүйелі түрде жалғастыру, перспективалы бастамаларды бірлесіп әзірлеу және оларды нақты тәжірибелік жобаларға айналдыру жөнінде келісімге келді.
