Ёш жаҳон чемпиони тантанали кутиб олинди
Шу кунларда Малайзия пойтахти Куала-Лумпур шаҳрида муай-тай (Таиланд жанг санъати) бўйича катталар, ўсмирлар ва ёшлар ўртасида жаҳон чемпионати бўлиб ўтди.
Дунёнинг кўплаб мамлакатларидан кучли спортчилар қатнашган мазкур чемпионатда мамлакатимиз ёшлар терма жамоаси сафида хонободлик Асилбек Янгибоев иштирок этиб, ўз вазн тоифасида 1- ўринни қўлга киритди. У олтин медаль ва жаҳон чемпиони деган юксак шарафга сазовор бўлди.
Ёш чемпионни Хонобод шаҳар ҳокими Элёрбек Абдураҳмонов бошчилигида кенг жамоатчилик вакиллари, мураббийлар, ёш спортчилар ҳамда чемпионнинг оила аъзолари тантанали равишда кутиб олди.
Тантанали тадбирда сўз олганлар ёш чемпионни ғалаба билан муборакбод этиб, Президентимиз ташаббуси билан мамлакатимизда ёшлар спортини ривожлантириш, ёш спортчиларнинг ўз иқтидор ва салоҳиятларини юзага чиқариш учун кенг имкониятлар яратиб берилаётганлигини таъкидлади.
Асилбекка келгуси мусобақаларда ҳам улкан зафарлар тилаб, унинг ғалабаси юртимиз ёш спортчиларига фахр-ифтихор ва улкан мотивация бериши қайд этилди.
Ф. Убайдуллаев, З.Умрзоқов (сурат), ЎзА мухбирлари
