VI Бутунжаҳон кўчманчилар ўйинлари давом этмоқда
Қирғизистоннинг Иссиқкўл вилоятида VI Бутунжаҳон кўчманчилар ўйинлари давом этмоқда.
Айтиш лозим, 90 дан ортиқ мамлакатдан 3 мингдан зиёд спортчи иштирок этаётган ўйинларнинг асосий мусобақалари ҳамда тадбирлари Бишкек ва Чўлпон-Ота шаҳарларида ташкил этилмоқда.
Этноспортнинг 43 та тури бўйича ўтаётган ўйинларда мамлакатимиз спортчилари мусобақаларнинг 32 йўналишида совринли ўринларга даъвогарлик қилади.
Юртимиз спортчилари мас-рестлинг, самбо, армрестлинг, кураш, белбоғли кураш, баҳодирлар ўйинлари, улоқ-кўпкари, бел олиш ва учкураш, камондан отиш, от спорти, сумо, ақлий ўйин ҳамда ўзбек жанг санъати каби спорт турларида ватанимиз шарафини ҳимоя қилмоқда.
Бугун, 2 сентябрь куни ўйинлар дастуридан ўрин олган бир қатор йўналишларда мусобақалар ташкил этилади.
Мамлакатимиз вакиллари бугун кун давомида миллий якка кураш турлари, камондан отиш мусобақалари, от спорти йўналишларида совринли ўринларга даъвогарлик қилади.
Эслатиб ўтамиз, VI Бутунжаҳон кўчманчилар ўйинларининг ортда қолган дастлабки мусобақалар кунида кураш бўйича Ўзбекистон терма жамоаси аъзоси Нўмонжон Ражабов +90 килограмм вазнда олтин медалга сазовор бўлди. Унинг шарафига Давлатимиз мадҳияси янграб, байроғимиз юксалди.
Мусобақалар 7 сентябрга қадар давом этади.
Т.Рўзиев, ЎзА
