Венесуэла қамоқхонасида оммавий исён кўтарилди
Венесуэланинг Баринас штатидаги “INJUBA” қамоқхонасида кутилмаган оммавий маҳбуслар исёни юз берди. Таъкидланишича, тартибсизликлар 24 май куни эрталаб, анъанавий давлат мадҳияси янграганидан сўнг бирдан бошланиб кетган.
Намойишда 1300 дан ортиқ маҳбус, жумладан, аёллар ҳам иштирок этган. Норозилик пайтида маҳбуслар бино томига ёпирилиб чиқиб, тўшаклар ва бошқа латта буюмларни ёқиб юборган. Вазият назоратдан чиққач, муассаса ичида ўқ овозлари ва портлашлар эшитилган.
Хавфсизлик кучлари тартибни тиклаш учун кўздан ёш оқизувчи газ ишлатган. Бунинг оқибатида юздан ортиқ маҳбус аёлнинг соғлиғи ёмонлашган. Маҳбусларнинг ташқарида йиғилган яқинлари Миллий гвардия бўлинмаларининг ичкарига киришига тўсқинлик қилган, бироқ ҳарбийлар барибир қамоқхона ҳудудига кириб борган.
Маълум бўлишича, исёнга қамоқхонанинг янги раҳбари Элвис Макуаре Герреро томонидан жорий этилган ўта қаттиқ тартиб-қоидалар, маҳбусларга нисбатан ёмон муносабат ва яқинлари билан учрашувларнинг чеклаб қўйилгани асосий сабаб бўлган.
Ф.Яхшибоева, ЎзА
