Белградда йирик норозилик намойишлари авж олди

Сербия пойтахтининг “Славия” майдонида талабаларнинг йирик норозилик акциялари ўтказилди. Кўчаларга чиққанлар ўлкада муддатидан олдин сайловлар ўтказилишини талаб қилмоқда.

Таъкидланишича, акция “Талабалар ғалаба қозонмоқда” (“Studenti pobeđuju”) шиори остида ўтган. Мамлакат президенти Александр Вучич парламент сайловлари жорий йилда бўлиб ўтишини бир неча бор таъкидлаган бўлса-да, аммо ҳали расман куни маълум қилинмаган.

Шаҳар полицияси ҳисоб-китобларига кўра, акцияда 34 мингга яқин иштирокчи қатнашган. Айрим нодавлат ташкилотлари эса намойишчилар сонини 180–190 минг киши деб баҳолади ва ушбу акцияни 2000 йилда Сербия ҳамда Югославия собиқ президенти Слободан Милошевич ҳокимиятдан ағдарилганидан кейинги энг йирик намойиш, деб атади.

Митинг вақтида намойишчилар ва полициячилар ўртасида тўқнашувлар юз берди. Мамлакат Ички ишлар вазирлиги ўнлаб одамлар қўлга олингани ҳақида хабар берди.

Аввалроқ, Сербия етакчиси Александр Вучич президентлик ваколатлари муддати тугаши муносабати билан ўз лавозимини тарк этиши мумкинлигини айтганди. У 2017 йилда республика президенти этиб сайланган. 2022 йилда Вучич иккинчи муддатга қайта сайланди. Унинг президентлик ваколатлари муддати 2027 йилда ўз ниҳоясига етади.

Ў.Алимов, ЎзА