Ulkan paxta klasteri barpo etiladi
Buxoro viloyatida qishloq xo‘jaligi va to‘qimachilik sanoatini yangi bosqichga olib chiqishga qaratilgan yirik investitsiya loyihasi amalga oshirilmoqda. Bu tashabbus nafaqat cho‘l hududlarini obod qilish, balki minglab yangi ish o‘rinlari yaratish, eksport salohiyatini oshirish va zamonaviy agrotexnologiyalarni keng joriy etishda muhim qadam bo‘lishi kutilmoqda.
Shu munosabat bilan Buxoro viloyati hokimi Botir Zaripov Xitoyning yirik sanoat kompaniyalaridan biri — “Lihua Group”ning O‘zbekistondagi bosh vakili Van Xun Tu boshchiligidagi delegatsiyani qabul qildi. Uchrashuvda ikki tomonlama hamkorlikni yanada kengaytirish, qishloq xo‘jaligida yuqori samaradorlikka erishish hamda investitsiya loyihalarini jadal amalga oshirish masalalari atroflicha muhokama qilindi.
Loyihaga muvofiq, Shofirkon tumanida 20 ming gektar, Romitan tumanida esa 9 ming gektar cho‘l yerlarini o‘zlashtirish rejalashtirilgan. Ushbu hududlarda paxtachilikdan tortib, uni qayta ishlash, tayyor to‘qimachilik mahsulotlari ishlab chiqarishgacha bo‘lgan to‘liq qiymat zanjirini qamrab oluvchi zamonaviy agrosanoat klasteri tashkil etiladi.
Bugungi kunda xitoylik investorlar tomonidan “Jemchujina Romitan” mas’uliyati cheklangan jamiyati tashkil etilgan bo‘lib, Romitan tumanidagi “Varaxsha” cho‘l massivini o‘zlashtirish ishlari jadal sur’atlarda davom etmoqda. Investitsiya loyihasining dastlabki bosqichida infratuzilmani shakllantirish, yerlarni qishloq xo‘jaligi aylanmasiga kiritish va zamonaviy sug‘orish tizimlarini joriy etish ishlariga alohida e’tibor qaratilmoqda.
Joriy yilda mazkur hududda Xitoy seleksiyasiga mansub “Xin Lu Zao-57” paxta navi ekilib, Shinjon tajribasiga asoslangan ilg‘or agrotexnologiyalar amaliyotga tatbiq etilmoqda. Xususan, plyonka ostida yetishtirish usuli, suvni tejovchi texnologiyalar hamda yuqori hosildorlikka xizmat qiluvchi innovatsion agrotexnik yondashuvlar sinovdan o‘tkazilmoqda. Bu esa hosildorlikni oshirish, suv resurslaridan oqilona foydalanish va mahsulot sifatini yuksaltirishga xizmat qilishi kutilmoqda.
Muzokaralar davomida loyihani o‘z vaqtida va samarali amalga oshirish bilan bog‘liq vazifalar muhokama qilinib, mavjud tashkiliy masalalarni tezkor hal etish bo‘yicha aniq chora-tadbirlar belgilab olindi. Tomonlar hamkorlikni yanada kengaytirish, investitsiyalar hajmini oshirish hamda zamonaviy texnologiyalarni Buxoro qishloq xo‘jaligiga keng tatbiq etish borasida o‘zaro manfaatli kelishuvlarga erishdilar.
Bu loyiha oddiy investitsiya emas — u Buxoro cho‘llarini unumdor maydonlarga aylantirish, zamonaviy agrosanoat ekotizimini shakllantirish va hudud iqtisodiyotiga yangi sur’at bag‘ishlaydigan strategik tashabbusdir. Eng muhimi, mazkur hamkorlik natijasida yuqori qo‘shilgan qiymatga ega mahsulotlar ishlab chiqarish, eksport hajmini kengaytirish va yuzlab, hatto minglab aholi uchun barqaror ish o‘rinlari yaratilishi kutilmoqda. Bu esa Yangi O‘zbekistonda investitsiyaviy hamkorlik va sanoat taraqqiyotining yana bir yorqin namunasi sifatida ahamiyat kasb etadi.
Zarif Komilov, O‘zA muxbiri
