Трамп Эрон бўйича баёнот берди

АҚШ Президенти Дональд Трамп сешанба куни бўлиб ўтадиган Конгрессга оралиқ сайлов олдидан охирги марта сайловчиларга мурожаат қилиб, уларни овоз беришда фаол иштирок этишга чақирди.

Бу ҳақда “Anadolu” агентлиги хабар берган. Вашингтондаги Линкольн мемориали яқинида бассейн очилиши тадбирида сўзга чиққан АҚШ раҳбари ўз маъмуриятининг ички ва ташқи сиёсатдаги ютуқларига алоҳида тўхталди.

Хусусан, навбатдаги оралиқ сайловни мамлакат тарихидаги энг муҳим воқеалардан бири, деб атади ва фуқароларни республикачи номзодларини қўллаб-қувватлашга чақирди. Демократик партияни кескин танқид қилган етакчи Мичиган штатидан кўрсатилган номзод Абдул Ал-Саидни мисол тариқасида келтириб, у Сенатга сайланмаслиги кераклигини таъкидлади.

Шунингдек, Президент аҳоли учун энг долзарб масалалардан бири ҳисобланган ёнилғи нархи мавзусига ҳам изоҳ берди. Унинг таъкидлашича, Эрон билан боғлиқ ҳарбий кескинлик тез орада якунига етади ва бензин тез арзонлашади. Трамп сўзларига кўра, Вашингтон ушбу қарама-қаршиликда устунликка эга, Теҳроннинг ҳарбий имконияти ва иқтисодий аҳволи сезиларли даражада заифлашган.

Бундан ташқари Оқ уй раҳбари Эрон ядро қуроли яратишига ҳеч қачон йўл қўйилмаслигини яна бир бор эслатиб, Теҳрон ҳам буни яхши англаб етганини билдирди. Нутқи якунида Америка раҳбари Гренландия бўйича Дания ҳукумати ва маҳаллий раҳбарият билан олиб борилган ижобий мулоқот учун миннатдорлик изҳор этди.

Ф.Яхшибоева, ЎзА