Трамп Эрон билан музокара бошланишини кутяпти (+видео)
АҚШ Президенти Дональд Трамп яқин кунларда Эрон билан музокара қайта тикланишини кутмоқда. Аввалроқ Оқ уй раҳбари Теҳрон томонидан Ҳурмуз бўғозини очиш бўйича таклиф этилган етти кунлик режани рад этган эди, деб хабар берди DW.
«Эрон билан янги музокара ўтказилишини кутяпмиз. Улар битим тузишни хоҳлаяпти, аммо бу биз истаган келишув эмас. Бир йил олдин бунга рози бўлардик. Улар ўз кучини ортиқча баҳолаб юборишди», — деди Оқ уй раҳбари.
Маълумотга кўра, 28 сентябрдаёқ Эрон ташқи ишлар вазири Аббос Арағчий ва АҚШ Президенти махсус вакили Стивен Уиткофф учрашув ўтказиши мумкин. Шу билан бирга, икки давлатнинг эҳтимолий келишувга ёндашуви бир-биридан фарқ қилиши таъкидланмоқда.
Теҳрон ҳар қандай музокарани, аввало, Ҳурмуз бўғозини тўлиқ очиш ва АҚШ томонидан жорий этилган денгиз қамалини бекор қилишга қаратиш ниятида. Вашингтон эса ядровий дастур бўйича ён беришни ҳам ўз ичига олган кенгроқ келишув талаб қилмоқда.
ОАВ хабарига кўра, шартлар орасида барча фронтлар, жумладан Ливандаги жангни тўхтатиш, Эрон портларига қўйилган блокадани бекор қилиш, Теҳрон активларини музлатишни тўхтатиш ва Эрон нефти экспортига қўйилган чекловни бекор қилиш каби талаблар бор.
26 сентябрь куни Оқ уй раҳбари ушбу таклиф рад этилганини маълум қилган.
«Таклифни рад этамиз. Улар жидий талафот кўряпти, шунинг учун бўғоз дарҳол очилишини назарда тутувчи келишув хоҳлаяпти. Битим тузиш бизга ҳам маъқул, аммо бундай муросани қабул қилиб бўлмайди», — деди АҚШ Президенти.
“The Wall Street Journal” газетаси маълумотига кўра, АҚШ Президенти ёрдамчиларига ноябрь ойида Конгрессга оралиқ сайловдан кейин Эронга қарши қайта зарба бериш нияти борлигини ҳам билдирган. Бунга сабаб, Теҳрон ядровий дастурдан бутунлай воз кечиш ҳақидаги талабни бажармаётганидир.
Кенжа Бекжонов, Анвархўжа Аҳмедов, (видео) ЎзА
