Тоза сув — фаровон ҳаёт манбаи
Инсон ҳаётини сувсиз тасаввур этиб бўлмайди. Бир томчи тоза сув замирида саломатлик, ободлик, хотиржамлик ва фаровон турмуш мужассам. Шу боис бугун юртимизда аҳолини сифатли ичимлик суви билан таъминлаш масаласи энг муҳим ижтимоий вазифалардан бири сифатида қаралмоқда.
Айниқса, чекка ҳудудларда замонавий ва ишончли ичимлик суви тизимини яратиш, аҳолини марказлашган тармоқларга кенг жалб этиш борасида кенг кўламли ишлар амалга оширилмоқда. Бу жараён давлат раҳбари томонидан илгари сурилаётган инсон қадрини улуғлаш, аҳоли учун муносиб ва қулай турмуш шароитларини яратишга қаратилган ислоҳотларнинг муҳим йўналишларидан биридир.
Жондор туманида ҳам ана шу эзгу мақсад йўлида салмоқли ишлар бошлаб юборилган. Туман аҳолисини тоза ва сифатли ичимлик суви билан таъминлаш мақсадида марказлашган сув таъминоти тармоқлари кенгайтирилиб, мавжуд гидроиншоотлар модернизация қилинмоқда.
Хусусан, Ўзбекистон Республикаси Вазирлар Маҳкамасининг 2020 йил 12 августдаги 482-сон қарорига мувофиқ, “Осиё инфратузилма инвестициялари банки” иштирокида “Бухоро вилоятининг ичимлик суви таъминоти ва канализация тизимларини ривожлантириш ва модернизация қилиш” лойиҳаси амалга оширилмоқда.
Умумий қиймати 20,6 миллиард сўм бўлган мазкур лойиҳа Жондор тумани учун нафақат йирик инфратузилма ташаббуси, балки минглаб оилалар ҳаётига бевосита дахлдор муҳим ижтимоий лойиҳадир.
Лойиҳа доирасида туманда жами 856 километр ичимлик суви тармоқларини барпо этиш, 3 та янги сув иншоотини қуриш ва 9 та мавжуд гидроиншоотни мукаммал таъмирлаш режалаштирилган. Энг муҳими, ушбу ишлар 2027 йил якунига қадар аҳолининг марказлашган ичимлик суви билан қамровини 85 фоизга етказиш имконини беради.
Бу рақамлар ортида эса оддий статистика эмас, балки минглаб хонадонларнинг кундалик ҳаёти, оналарнинг хотиржамлиги, болаларнинг саломатлиги, хонадонлардаги файзу барака мужассам. Айни пайтда лойиҳа доирасида Жондор туманининг Алели маҳалласида водопровод тармоқларини ётқизиш, қурилиш-монтаж ишларини амалга ошириш қизғин давом этмоқда.
Пудратчи ташкилот — “MChN House” МЧЖ томонидан олиб борилаётган ишлар жараёнида янги сув тармоқлари босқичма-босқич барпо этилмоқда. Бу эса яқин келажакда маҳалладаги хонадонларни марказлашган ичимлик суви тизимига улаш имконини кенгайтиради.
Тасаввур қилинг: кеча-кундуз сув излаб, овора бўлган хонадон ўрнида энди ҳар бир оила учун барқарор ва ишончли сув таъминоти пайдо бўлади. Ҳовлилар, ошхоналар, мактаб ва бошқа ижтимоий объектларга сифатли ичимлик суви кириб боради.
Бу — оддий қувур эмас. Бу — инсон ҳаётига қулайлик олиб кирувчи тараққиёт йўли.
Лойиҳа доирасида инфратузилмани янгилаш билан бир қаторда сув ресурсларидан оқилона фойдаланиш, тармоқлардаги йўқотишларни камайтириш, ноқонуний уланишларнинг олдини олиш ва истеъмол маданиятини юксалтиришга ҳам алоҳида эътибор қаратилмоқда.
Зеро, бугун янги тармоқ қуриш қанчалик муҳим бўлса, мавжуд сув ресурсларини асраб-авайлаш ҳам шунчалик долзарбдир. Сувнинг ҳар бир томчиси — келажак олдидаги масъулият. Уни тежаб ишлатиш эса нафақат иқтисодий, балки экологик маданият белгисидир.
Давлат раҳбари ташаббуси билан мамлакатимизда амалга оширилаётган кенг кўламли ислоҳотларнинг асл мақсади ҳам шунда — инсонни рози қилиш, унинг ҳаётини енгиллаштириш, ҳар бир оила учун муносиб шароит яратиш. Жондордаги ичимлик суви лойиҳаси ана шу эзгу мақсадларнинг ҳаётий ифодасидир.
Зариф Комилов, ЎзА мухбири
