Тошкентдаги Она ва бола саломатлиги маркази халқаро аккредитациядан ўтди
Ҳар бир жамиятнинг эртанги куни соғлом ва баркамол авлодга боғлиқ. Она ва бола саломатлигини асраш эса давлат сиёсатининг энг устувор йўналишларидан бири. Шу боис, юртимизда ушбу соҳани ривожлантириш ва тиббий хизмат сифатини жаҳон стандартларига етказиш борасида кенг кўламли ишлар амалга оширилмоқда.
Мазкур саъй-ҳаракатлар натижаси ўлароқ, Республика ихтисослаштирилган она ва бола саломатлиги илмий-амалий тиббиёт марказининг Тошкент шаҳар филиали нуфузли халқаро аккредитациядан муваффақиятли ўтди.
Шу муносабат билан ўтказилган тадбирда муассасанинг тиббий хизмат сифатини ошириш ва халқаро стандартларни жорий этиш борасидаги ишлари қайд этилди. Бу ютуқ “Accreditation Center for Quality in Healthcare” (ACQH) ташкилоти томонидан ўтказилган ташқи баҳолаш натижалари орқали тўлиқ тасдиқланди.
Аккредитация жараёнида муассасанинг клиник фаолияти, бошқарув тизими, сифат назорати ҳамда беморлар хавфсизлиги пухта ўрганилди. Текширув натижалари барча кўрсаткичлар халқаро талабларга тўла жавоб беришини кўрсатди.
Марказда тадбир ташкил этилиб, филиал раҳбариятига халқаро сертификат топширилди. Шунингдек, ушбу ютуққа эришишда жонбозлик кўрсатган фаол ходимлар, патронаж доялар ҳамда клиник ординаторлар муносиб тақдирланди.
Қўлга киритилган ушбу ютуқ оналар ва болалар саломатлигини муҳофаза қилиш борасидаги ишларнинг ўзига хос эътирофидир.
М.Қосимова,
ЎзА
