Тадбиркор мурожаати эътиборда
Мамлакатимизда тадбиркорлик субъектларини ҳар томонлама қўллаб-қувватлаш, уларнинг қонуний ҳуқуқ ва манфаатларини таъминлаш давлат сиёсатининг муҳим йўналишларидан бири ҳисобланади.
Айниқса, экспорт-импорт жараёнларида юзага келаётган масалаларни тезкор, очиқ ва қонунчилик асосида ҳал этиш божхона органлари фаолиятининг устувор вазифаларидан саналади.
Шу боис тадбиркорлардан келиб тушаётган ҳар бир мурожаат атрофлича ўрганилиб, мавжуд муаммоларни ҳал этиш бўйича амалий чоралар кўрилмоқда. Ана шундай мурожаатлардан бири Самарқанд вилоятида фаолият юритаётган “Neotech Stone” масъулияти чекланган жамияти раҳбари Ислом Баротов томонидан билдирилди.
Мурожаатда корхона томонидан “экспорт” божхона режимида расмийлаштирилган ҳамда ҳужжатларда “натрий хлорид” сифатида кўрсатилган маҳсулотлар Бухоро вилоятидаги “Олот” чегара божхона постида экспертиза хулосаларида аниқланган тафовутлар сабабли вақтинча сақловга олингани қайд этилган. Мурожаат келиб тушиши билан мазкур ҳолат божхона органлари томонидан зудлик билан назоратга олинди.
Масала юзасидан товарларнинг таркиби ва хусусиятларини аниқлаш мақсадида комплекс экспертиза ўтказилди. Барча зарур таҳлил ва ўрганишлар якунланганидан сўнг Бухоро вилояти божхона бошқармаси бошлиғи Б. Муратов ҳамда корхона раҳбари иштирокида очиқ мулоқот ташкил этилди. Учрашув давомида тадбиркорга комплекс экспертиза натижалари атрофлича тушунтирилди.
Экспертиза хулосасига кўра, сақловга олинган маҳсулотлар таркибида “калий хлорид” ва “натрий хлорид” аралашмалари мавжудлиги аниқланган. Шу муносабат билан жами 72 тонна товарни қайта ишлаш ва кейинчалик экспорт қилиш мақсадида корхона ихтиёрига қайтариш бўйича қарор қабул қилингани маълум қилинди. Шунингдек, божхона омборида вақтинча сақланаётган 72 тонна “калий хлорид” маҳсулотини экспорт қилиш учун амалдаги тартибларга мувофиқ тегишли карантин ва ваколатли идоралардан рухсатнома олиниши лозимлиги тушунтирилди.
Барча рухсат берувчи ҳужжатлар расмийлаштирилганидан кейин маҳсулотни экспорт қилиш бўйича божхона расмийлаштирувлари қонунчилик талаблари асосида амалга оширилиши маълум қилинди. Таъкидлаш жоизки, бундай очиқ мулоқот ва манзилли ёндашув тадбиркорларни қийнаётган масалаларни жойида ҳал қилиш, уларга ҳуқуқий жиҳатдан тўлиқ тушунтириш бериш ҳамда давлат органлари билан бизнес вакиллари ўртасида ўзаро ишончни мустаҳкамлашга хизмат қилмоқда. Хулоса қилиб айтганда, божхона органлари томонидан мурожаатларни холисона кўриб чиқиш, зарур экспертизаларни ўз вақтида ташкил этиш ва идоралараро ҳамкорликни самарали йўлга қўйиш тадбиркорлик фаолиятини қўллаб-қувватлашнинг муҳим омили бўлиб қолмоқда. Бу эса мамлакатимизда қулай бизнес муҳитини шакллантириш, ташқи савдо фаолиятини янада ривожлантириш ҳамда экспорт салоҳиятини оширишга хизмат қилади.
Зариф Комилов, ЎзА
