Сунъий интеллектдан қўрқишга асос борми? (+видео)
Anadolu агентлиги сунъий интеллект соҳасида фаолият юритаётган компания вакилларининг фикрларини эълон қилди. Масалан, OpenAI раҳбари Сэм Алтман одамларнинг сунъий интеллект хавфларидан хавотирланиши асосли деб ҳисоблайди. Nvidia раҳбари Женсен Хуанг эса, аксинча, сунъий интеллектдан хавотирланиш ёки уни тартибга солиш керак эмас, деган фикрни билдирган.
Сунъий интеллект имкониятлари жуда тез ривожланаётган пайтда одамлар уларнинг имкониятларидан ташқари кутилмаган хавфларидан ҳам хавотир олишмоқда. Масалан, бу ҳақда OpenAI бош директори Сэм Алтман Сан-Францискодаги конференцияда сўзлаган нутқида, дунё сунъий интеллектдан хавотирланиши учун барча асосларга эга, деб айтган. У сунъий интеллект имкониятлари аввалгига қараганда анча тез ривожланаётганини таъкидлади. Алтманнинг таъкидлашича, сунъий интеллект яратаётган компаниялар фақат ривожланишни кўзламай, аввало хавфсизликка эътибор қаратиши керак.
Шу билан бирга, Nvidia бош директори Женсен Хуанг сунъий интеллект технологияларининг янги нусхаларини чиқариш ёки чиқармаслик ҳақидаги қарорни ташқи ташкилотлар эмас, технологияни яратаётган компанияларнинг ўзи қабул қилиши кераклигини айтди. Унинг фикрича, сунъий интеллектда инновацияларни тез ривожлантириш билан хавфсизликни бир-бирига қарама-қарши қўйиш нотўғри. Хуанг, шунингдек, сунъий интеллект орқали автоматлаштириш одамларнинг иш ўринларидан маҳрум бўлишига олиб келиши ҳақидаги хавотирларни ҳам “бемаънилик” деб атади.
Meta бош ижрочи директори Марк Цукерберг ҳам сунъий интеллект яратаётган компаниялар ўз моделларини хавфсиз ишлаб чиқиш учун етарли даражада масъулият ва манфаатга эга эканини билдирди. Унинг айтишича, сунъий интеллект лабораториялари ўз моделларини хавфсиз ишлаб чиқиш учун зарур чораларни мустақил равишда кўриши керак. Meta раҳбари фойдаланувчилар ўз манфаатларига мос келмайдиган ва уларнинг кўрсатмаларини бажармайдиган сунъий интеллект агентларидан фойдаланмасликларини таъкидлади. Унинг фикрича, сунъий интеллект моделлари етказган зарар компанияларни юридик жавобгарликка тортилишига сабаб бўлиши керак. Бу эса компанияларни хавфсизликни биринчи ўринга қўйишга ундайди.
Аввалроқ технология соҳасининг бир қатор машҳур вакиллари, жумладан OpenAI раҳбари Сэм Алтман ва Илон Маск сунъий интеллектни ишлаб чиқиш суръатларини секинлаштиришга чақирган эди.
Кенжа Бекжонов, Салимжон Обиджонов, ЎзА
