Стокгольм сув ҳавзасидан 48 тонна темир-терсак чиқариб олинди
"Hands 2 Ocean" – H2O лойиҳаси кўнгиллилари Швеция пойтахти Стокголмь сув йўлидаги чиқиндини тозалашда давом этяпти.
“АзерТАЖ” хабарига кўра, Лильехольмен ҳудудида олиб борилган сўнгги сув остини тозалаш амалиёти давомида ғаввослар электр скутер, велосипед, қурилиш арматураси, харид аравачаси, электроника, қурол-яроқ ва ҳатто чўкиб кетган машина ҳам топган.
Ташаббус ташкилотчилари фикрича, сўнгги йилларда сув тубидан 1800 дона, тахминан 48 тонна келадиган электр скутер чиқариб олинган. Маълумки, бундай қурилма учун қувватлагич оғир металлдан ясалади. Батарея парчаланганда эса заҳарли модда чиқаради ва атроф-муҳитга жиддий экологик хавф туғдиради.
2018 йил йўлга қўйилган, тахминан 300 нафар кўнгиллини бирлаштирган мазкур лойиҳа иштирокчилари ҳафта давомида сув остида тозалаш ишларини олиб боради, топилган чиқиндини саралайди ва қайта ишлашга юборади. Баъзан улар қачондир чўкиб кетган телефон ёки компьютер маълумотини тиклаб, эгасига қайтариб бериши мумкин. Изланувчилар бундай тадбирлар сув ифлосланиши муаммосига эътибор қаратиб, сувдаги чиқинди миқдорини камайтиришига умид қилмоқда.
Г.Сатторова, ЎзА
