Соғинч ва дард куйчиси
Атоқли ижодкор – Шукур Қурбон дарёдил, самимий, яхши маънодаги дарвешона шоир. Унинг юзлаб шеърлари дилбар қўшиқларга айланган. Ўзбекистон Ёзувчилар уюшмасида “Дўстлик”ордени соҳиби, таниқли шоир Шукур Қурбон таваллудининг 75-йиллиги муносабати билан маънавий-маърифий тадбир бўлиб ўтди.
Унда таниқли шоир ва ёзувчилар, адабиётшунос олимлар, ижодкор ёшлар ҳамда шеърият ихлосмандлари иштирок этди.
Анжуманни Ёзувчилар уюшмаси раисининг ижодий масалалар бўйича биринчи ўринбосари Минҳожиддин Мирзо Шукур Қурбоннинг замонавий ўзбек шеъриятида ўзига хос овоз ва бадиий тафаккур соҳиби сифатида алоҳида ўрин эгаллашини таъкидлади.
Унинг ижодида Ватанга муҳаббат, инсон қадри, миллий ғурур, она заминга садоқат, меҳнаткаш инсон тақдири ва эзгулик ғоялари юксак бадиий маҳорат билан акс этади.
Шукур Қурбон ўзбек адабиётининг сўнгги ярим асрлик тараққиётида фаол иштирок этган, миллий шеъриятимизни мазмун ва шакл жиҳатидан бойитишга муносиб ҳисса қўшган ижодкорлардан биридир.
Унинг шеърларида халқона оҳанг, самимият, ҳаёт ҳақиқати ва инсон руҳиятининг нозик қирралари чуқур фалсафий мушоҳадалар билан уйғунлашган.
Шоирнинг ижодида Ватан ва истиқлол, муҳаббат ва садоқат, табиат ва инсон, ҳаёт ва вақт ҳақидаги мушоҳадалар юксак бадиий ифода топган. Шукур Қурбоннинг сермаҳсул ижодий фаолияти давомида шеърий тўпламлари, достонлари ва публицистик асарлари китобхонлар эътирофига сазовор бўлди. Унинг асарлари юртимиздаги адабий муҳит ривожига муносиб ҳисса қўшиб, китобхонлар қалбида эзгулик, меҳр-оқибат, ватанпарварлик ва миллий ўзликни англаш туйғуларини мустаҳкамлашга хизмат қилди.
Шоир ижодида ҳаёт ҳақиқати, замондошлар тақдири, миллий қадриятларга ҳурмат ва инсон маънавиятини юксалтириш ғоялари етакчи ўрин тутади.
Тадбирда устоз шоирнинг бой ижодий мероси, инсоний фазилатлари, адабий муҳитдаги ўрни ва ёш ижодкорлар тарбиясидаги аҳамияти ҳақида фикр-мулоҳазалар билдирилди.
Шукур Қурбоннинг шеърлари йиллар ўтса-да, ўз бадиий қимматини йўқотмагани, улардаги ҳаётийлик, самимият ва юксак эстетик тафаккур бугунги китобхон учун ҳам руҳий озуқа бўлиб хизмат қилаётгани таъкидланди. Унинг ижоди адабиётнинг инсон қалбини тарбиялаш, эзгуликка чорлаш ва миллий маънавиятни юксалтиришдек юксак вазифаларини муносиб давом эттириб келаётгани алоҳида қайд этилди.
Тадбир доирасида шоир ижодидан намуналар ўқилди. Унинг ҳаёти ва фаолияти ҳақида хотиралар ёдга олинди. Ижодий меросининг бугунги адабий жараёндаги аҳамияти хусусида фикр алмашилди.
Маълумот учун, таниқли шоир ва таржимон, “Дўстлик” ордени соҳиби Шукур Қурбон ўзбек адабиёти тараққиётига муносиб ҳисса қўшган забардаст ижодкорлардан. У 1951 йилда Андижон вилоятининг Балиқчи туманида хизматчи оиласида таваллуд топган. Ўзбекистон Миллий университетининг филология факультетини тамомлаб, меҳнат фаолиятини мамлакатимиз адабий ҳаётининг нуфузли нашрларидан бири – «Шарқ юлдузи» журнали таҳририятида бошлаган.
Кейинчалик Ёзувчилар уюшмасининг Тошкент вилояти бўлими, Ўзбекистон Миллий телерадиокомпанияси, «Соғлом авлод учун» журнали таҳририяти ҳамда Алишер Навоий номидаги Ўзбекистон Миллий кутубхонаси нашриёт бўлимида масъул лавозимларда самарали меҳнат қилди.
Шукур Қурбоннинг ижодида Ватанга муҳаббат, инсон қадри, миллий қадриятларга садоқат, меҳр-оқибат ва ҳаёт фалсафаси юксак бадиий маҳорат билан ифода этилган. Унинг шеърлари халқона руҳ, самимият ва теран мушоҳадалари билан китобхонлар меҳрини қозонган.
Шоирнинг асарлари умумтаълим мактаблари дарсликлари ва ўқув қўлланмаларига киритилган. Бу ижод намуналари ёшларнинг маънавий-эстетик тарбиясида муҳим ўрин тутади. Шунингдек, Ўзбекистон радиосининг «Олтин фонди»да унинг радиопостановкалари ҳамда юзга яқин қўшиқлари сақланаётгани ижодкорнинг миллий маданиятимиз ва адабиётимиз ривожига қўшган муносиб ҳиссасининг ёрқин ифодасидир.
Шукур Қурбон таваллудининг 75 йиллигига бағишланган мазкур маънавий-маърифий тадбир устоз шоир хотирасига юксак эҳтиром ифодаси бўлиши билан бирга, унинг бой адабий меросини кенг тарғиб қилиш, миллий шеърият анъаналарини асраб-авайлаш ва ёш авлодни китобхонлик ҳамда юксак маънавият руҳида тарбиялашга хизмат қилувчи муҳим адабий-маърифий анжуман сифатида катта аҳамият касб этди.
Назокат Усмонова,
Аҳмаджон Тўраев (суратлар), ЎзА
