Шўрчида бананчилик ривожланади
Сурхондарё вилоятининг Шўрчи туманидаги Ободон маҳалласида барпо этилаётган йирик бананчилик иссиқхонасида банан етиштиришга бағишланган семинар бўлиб ўтди.
Туман ҳокимлиги ва қишлоқ хўжалиги бўлими, вилоят агрохизматлар маркази ва унинг туман бўлими, боғдорчилик агентлигининг туман лойиҳа офиси ҳамкорлигида ташкил этилган тадбирда мўъжазгина иссиқхоналарда банан парваришлаётган ва банан етиштиришга қизиқиш билдирган боғбонлар иштирок этди.
Семинарда иссиқхона шароитида банан етиштиришнинг илмий ва амалий жиҳатдан асосланган тўлиқ агротехнологик жараёни ҳақида атрофлича маълумотлар берилди. Банан навларини танлаш, кўчат тайёрлаш ва экиш, экиш схемаси, ўсимликларни парваришлаш, фертигиация ва ўғитлаш режими, касаллик ҳамда зараркунандаларга қарши курашиш, ҳосилни йиғиш ва сақлаш тартиби юзасидан фикр алмашилди.
Туманда банан етиштиришга қизиқиш ортиб бормоқда. Ҳозир ўттиздан ортиқ оила томорқасида иссиқхона бунёд этиб, шу турдаги ўсимликни парваришлаётир. Бананчиликнинг жуда кам харажатли ва кўп даромадли бизнес эканини амалда ҳис этган томорқачилар соҳани ривожлантириш истагини билдирмоқда. Мутахассисларнинг айтишича, бир сотих иссиқхона ташкил этиш туманда ўртача 9 миллион сўмга тушади. Бу ерда 25 туп банан кўчати парваришласа, қисқа вақтда ҳосил тугади. Йилига бир туп банандан икки-уч марта 25-30 килограммдан ҳосил олиб, 60 миллион сўмгача даромад қилса бўлади.
Туман ҳокимлиги ва қишлоқ хўжалиги бўлими, вилоят агрохизматлар маркази ва унинг туман бўлими, боғдорчилик агентлигининг туман лойиҳа офиси ҳамкорлигида ташкил этилган тадбирда мўъжазгина иссиқхоналарда банан парваришлаётган ва банан етиштиришга қизиқиш билдирган боғбонлар иштирок этди.
Семинарда иштирокчиларга Қишлоқ хўжалиги вазирлиги, Қишлоқ хўжалигида билим ва инновациялар миллий маркази ва академик Маҳмуд Мирзаев номидаги Боғдорчилик, узумчилик ва виночилик илмий-тадқиқот институти Сурхондарё илмий-тажриба станциясининг Сурхондарё вилояти иссиқхоналарида банан етиштириш технологияси бўйича тавсияномаси тарқатилди.
Туманнинг Ободон маҳалласидаги етти гектар майдонда қурилаётган иссиқхонада кооперация усулида банан етиштирилади. Бу ерда 30 дан ортиқ деҳқон хўжалиги 17 минг туп кўчат экиб, йилига 1 минг 500 тонна атрофида ҳосил йиғиб олиш мўлжалланмоқда.
Холмўмин Маматрайимов,
ЎзА мухбири
