Шахмат: Нодирбек Ёқуббоев “Freestyle Friday Championship” саралаш турнири совриндори
Маҳоратли гроссмейстеримиз Нодирбек Ёқуббоев ҳар ҳафтанинг жума куни дунёнинг энг кучли шахматчилари иштирокида ўтказиладиган “Freestyle Friday Championship” саралаш турнирида совриндорликка эришди.
Айтиш лозим, мазкур чемпионатнинг саралаш мусобақалари ҳар ҳафтанинг жума куни онлайн тарзда ташкил этилади. Ўтказилган ўйинлар натижасига кўра, мавсум давомида тўплаган баллари ҳолатида ҳар бир бўлимда кучлилар қаторидан жой олган 7 нафар шахматчи мазкур чемпионатнинг плей-офф босқичига йўл олади.
Кеча ўтган “Freestyle Friday Championship” мусобақасининг навбатдаги баҳсида Нодирбек Ёқуббоев дунёнинг энг кучли гроссмейстерлари саналган Магнус Карлсен, Аржун Эригаиси, Ян Непомняший, Винсент Каймер сингари номдорлар билан куч синашди.
Ўтказилган 11 та турда Н. Ёқуббоев 8 та ғалаба, 2 та дуранг ва 1 та мағлубият қайд этди ва 9 очко жамғариб, мусобақани 2-ўринда якунлади. Ушбу муваффақият Нодирбекни “Freestyle Friday Championship” плей-оф босқичига янада яқинлаштирди.
Ҳамюртимиз Ёқуббоев АҚШ, Эрон, Словения, Россия, Қозоғистон каби давлатларнинг маҳоратли шахматчиларини доғда қолдирди. 9-турда Магнус Карлсен билан муроса йўлини танлади, 10-турда эса турнирнинг бу галги ғолиби эронлик Сина Моваҳедга имкониятни бой берди. Сўнгги турда украиналик Александр Бортникни мағлуб этди.
Турнир ғолиби эронлик гроссмейстер Сина Моваҳед бўлди. У 9,5 очко билан биринчи ўринни қўлга киритди.
Эслатиб ўтамиз, турнирда 136 нафар шахматчи иштирок этган бўлса, Магнус Карлсен 17-ўринни, юртимиз шахматчиларидан Жаҳонгир Воҳидов 6,5 очко билан 26, Мадинабону Халилова 5,5 очко жамғариб, 54-поғонадан жой олди.
Мазкур нуфузли чемпионатнинг саралаш мусобақалари 5 декабрга қадар давом этади.
Тўлқин Рўзиев, ЎзА
