Футзал: Ўзбекистон миллий терма жамоасига янги бош мураббий тайинланди

Маълумки, испаниялик мураббий Хосе Мария Мендес саломатлиги сабабли лавозимидан кетганидан сўнг, федерация томонидан миллий терма жамоа бош мураббийлигига бир қатор маҳаллий ва хорижлик номзодлар кўриб чиқилди. Ўрганиш ва таклифлар асосида миллий футзалимизни яхши биладиган, унинг ривожига муносиб ҳисса қўшиб келаётган Баҳодир Аҳмедов Ўзбекистон футзал федерацияси ижроия қўмитаси қарорига мувофиқ, терма жамоа бош мураббийи этиб тайинланди.

Тошкент вилоятининг Чирчиқ шаҳрида таваллуд топган Баҳодир Аҳмедов футзалдаги фаолиятини “Сплав”, “Электрокимёсаноат” ва “Солиқчи” жамоаларида бошлаган. Кейинчалик “Юнусобод”, “Ардус” ҳамда “Строител Зарафшон” клубларида тўп сурган ва мамлакат чемпионлигига эришган.

Мураббий сифатида “Максам-Чирчиқ” жамоасини чемпионат совриндорлари қаторига олиб чиққан, “Жиззах-Кентекс” билан эса Ўзбекистон чемпионлигига сазовор бўлган.

Миллий терма жамоа бош мураббийи сифатида аввал ҳам фаолият юритган Баҳодир Аҳмедов етакчилигидаги футзалчиларимиз икки марта Осиё кубогида бронза медалини қўлга киритган. 2021 йилги Жаҳон чемпионатида плей-оффгача етиб борган.

Келишувга кўра, Б.Аҳмедов 2028 йилги Осиё чемпионатининг якунига қадар Ўзбекистон миллий терма жамоасини бошқаради.

Тўлқин Рўзиев,

ЎзА