Сенат Раиси бошчилигидаги Ўзбекистон парламент делегацияси Бишкекка ташриф буюрди
Қирғиз Республикасининг Бишкек шаҳрида Туркий давлатлар Парламент ассамблеяси (ТуркПА)нинг 15-ялпи йиғилиши ўтказилмоқда.
Тадбир муносабати билан Озарбайжон, Қозоғистон, Туркия парламентлари вакиллари ҳамда Олий Мажлис Сенати Раиси Танзила Норбоева бошчилигидаги Ўзбекистон парламент делегацияси мазкур мамлакатга ташриф буюрди.
Эслатиб ўтамиз, ТуркПА – туркий тилли давлатлар парламентлари ўртасидаги ҳамкорликни ривожлантирувчи ва мувофиқлаштирувчи халқаро парламентлараро ташкилотдир.
Амалий ташриф билан Қирғиз Республикасига келган Ўзбекистон Республикаси Олий Мажлиси Сенати Раиси Танзила Норбоевани «Манас» халқаро аэропортида Жогорку Кенеш Тўрағасининг (Парламент Раисининг) ўринбосари Жилдиз Таалайбек қизи кутиб олди.
Бишкекда барча мамлакатлар делегацияларининг раҳбарлари ва аъзолари учун қабул маросими ўтказилди. Тадбирда қирғиз халқининг бой маданий мероси, миллий мусиқаси ва ўзига хос санъати ёрқин намойиш этилди. Миллий оҳанглар маросимга ўзгача шукуҳ бағишлаб, меҳмонларга қирғиз маданияти билан яқиндан танишиш имконини берди.
Ўзбекистон делегацияси раҳбари ташриф доирасида бир қатор юқори даражадаги учрашувлар ўтказади. Кузатувчи мақомида Туркий давлатлар Парламент ассамблеясининг (ТуркПА) навбатдаги йиғилишларида иштирок этади.
Норгул Абдураимова,
ЎзА
Бишкек шаҳри.
