Саудия ракета ва дрон ҳужумини қайтарди
Саудия Арабистони бошчилигидаги Араб коалицияси кучлари Хамис-Мушайт ва Жизон ҳудудларига йўналтирилган баллистик ракета ҳамда учувчисиз учоқларни йўқ илди.
Бу ҳақда “Анадолу” агентлиги хабар берган. Гуруҳ расмий вакили, бригада генерали Туркий Ал-Моликий ижтимоий тармоқ орқали баёнот беришича, ҳаво мудофаа тизими томонидан 2 ракета ва 4 ҳужумкор дрон ҳавода зарарсизлантирилган.
Генерал зарба айнан қайси нуқталардан йўналтирилганини очиқламаган бўлса-да, коалиция Ямандаги хусийларни жиловлаш бўйича тезкор чора кўриш давом этишини таъкидлади. Шунингдек, Ал-Моликий икки кун олдин хусийлар дрон билан Мадина шаҳридаги “Тайба” электр станциясига ҳам ҳужум уюштирганини эслатди.
Ямандаги фуқаролар уруши 2014 йил сентябрь ойидан бери давом этяпти. Ўшанда хусийлар мамлакат пойтахти Сано ва бир неча вилоятни эгаллаб олган. Саудия етакчилигидаги Араб коалицияси эса 2015 йил март ойидан буён Яманнинг халқаро тан олинган расмий ҳукуматини қўллаб-қувватлаб келмоқда.
Ф.Яхшибоева, ЎзА
