Путин ЕИ парчаланишини башорат қилди (+видео)
Россия Президенти Европа уюшмасидаги вазиятни собиқ совет ҳукуматидаги бошқарув тартиби билан қиёслаб, кўҳна қитъа давлатлари янада кучли босим ва мажбурлашга дуч келаётганини айтди. Бу хабарни TRT канали тарқатган.
Яъни, Владимир Путин Европа Иттифоқи ўз-ўзидан парчаланиб кетиши мумкинлигини таъкидлаган. “Валдай” форуми йиғилиши бошқарувчиси бирлашмани парчалаб юбориш имкони ҳақида сўраганда Путин шундай деган:
– Бунинг ҳожати йўқ, улар ўзлари парчаланиб кетади!
Аввалроқ РФ етакчиси ЕИ эҳтимолий емирилиши тўғрисидаги муҳокамага Москва аралашмаслигини айтиб, бу Россия гўёки Европа Иттифоқини парчалашга уриняпти, қабилида таассурот уйғотиши мумкинлигини билдирган. Унинг сўзларига кўра, Москва аксинча қитъа давлатлари билан ҳамкорлик қилишдан манфаатдор.
Хуллас, Путин Россия Европа давлатлари билан муносабатни тиклашга тайёрлигини қайд этган. Шу билан бирга айрим европалик сиёсатчиларни муайян давлатларга Москва билан мустақил равишда мулоқот ўрнатишга имкон бермаётганликда айблаган.
– Ҳозир айрим давлатларга Россия билан муносабат ўрнатишни кимдир тақиқламоқда, – деган у. – Бизга эса ҳеч ким тақиқ қўймаяпти, биз ҳамкорликка тайёрмиз.
Президенти бундай вазиятни “Совет Иттифоқи давридагидан ҳам кучлироқ диктат” деб атаган. Вазиятни у шундай изоҳлаган:
– Собиқ СССРда иттифоқдош республикалар расман ягона марказлашган давлат таркибига кирган. ЕИда эса назарий жиҳатдан бундай тизим йўқ эса-да, амалда мавжуд.
Бинобарин, Путин “амалда мавжуд” тизимга батафсил тўхталмаган. Қолаверса, Москва Европа билан ҳамкорлик истагидан воз кечмаётгани, мамлакатни мулоқотдан бош тортган томон, дея ҳисобламаслигини такрорлаган. Яъни, кўҳна қитъа давлатлари тегишли ишора қилса, Россия муносабатни тиклашга тайёр экан.
Кенжа Бекжонов, Анвархўжа Аҳмедов (видео), ЎзА
