Россиядаги бензин танқислиги урушга таъсир қиладими? (+видео)
Украина дронларининг Россия нефтни қайта ишлаш заводларига берган зарбалари ортидан мамлакатнинг кўплаб ҳудудларида ёқилғи танқислиги юзага келди, дейилади DW тарқатган хабарда
Айрим вилоятларда бензин сотувига чекловлар жорий этилган. Мутахассислар бу ҳолат урушга қандай таъсир қилиши мумкинлиги ҳақида фикр билдирмоқда.
Reuters агентлиги маълумотига кўра, Украина зарбалари натижасида Россиянинг нефтни қайта ишлаш қувватларининг қарийб 25 фоизи тўлиқ ёки қисман ишдан чиққан.
«Верстка» нашри ҳисоб-китобларига кўра, ёқилғи таъминотидаги муаммолар Россиянинг 78 та ҳудудига таъсир қилган. Шундан 29 тасида расман чекловлар жорий этилган. Энг оғир вазият Қримда кузатилмоқда. Бу ерда махсус транспортдан ташқари барча учун бензин савдоси тўхтатилган. Шунингдек, электр таъминотига ҳам вақтинча чекловлар киритилган.
Россиянинг марказий ва жанубий ҳудудларида бензин сотишга лимитлар белгиланди. Навбатлар ҳатто Сибирь ва Узоқ Шарқда ҳам пайдо бўлди.
Қримда вазият анча оғир. У ерда хусусий шахслар ва тижорат ташкилотларига бензин сотиш тўлиқ тўхтатилди. Ёқилғи етишмовчилиги жамоат транспорти ва озиқ-овқат таъминотига ҳам салбий таъсир кўрсатмоқда. Айрим ҳудудларда автобус қатновлари қисқартирилган ёки бекор қилинган.
Россия президенти Владимир Путин бу ҳолатни изоҳлар экан, Киев Россияда энергетика таъминотига ва туристик мавсумга салбий таъсир кўрсатишга уринаётганини билдирди. Унинг таъкидлашича, бу ҳужумлар фронтдаги вазиятни ўзгартирмайди.
Ҳарбий таҳлилчи Руслан Левиевнинг фикрича, Украина дронларининг аксарияти йўқ қилинаётган бўлса-да, ҳужумлар кўлами ортиб бормоқда. У шунингдек, Россиянинг асосий муаммоси ҳаво мудофаа тизимлари ва улар учун ўқ-дорилар етишмаслиги эканини таъкидлайди. Унинг фикрича, Россия ҳудуди жуда катта бўлгани учун уни тўлиқ ҳаво мудофааси билан қоплаш деярли мумкин эмас. Москвадаги баланд бинолар ҳам дронларнинг радарлардан яшириниб ҳаракатланишига ёрдам бериши мумкин.
Мутахассислар умумий хулоса сифатида, ёқилғи танқислиги Россия учун логистика ва иқтисодиётга қўшимча босим яратаётганини, аммо бу омилнинг урушнинг боришига қай даражада таъсир қилиши вақт ўтиши билан маълум бўлишини қайд этмоқда.
<iframe width="640" height="420" src="https://www.youtube.com/embed/6Z6sDpc9PWI" title="Rossiyadagi benzin tanqisligi urushga ta’sir qiladimi?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов (видео), ЎзА
