Францияда иссиқ сабаб атом реакторлари тўхтатилди (+видео)
Франциянинг давлат энергетика компанияси рекорд даражадаги иссиқ об-ҳаво туфайли икки атом реакторини вақтинча тўхтатди, деб хабар берди Euronews нашри.
Бу қарор дарёлардаги сув экотизимини муҳофаза қилиш мақсадида қабул қилинган. Мамлакатда айни кунларда иссиқлик оқибатида камида 18 киши вафот этган, 18 июндан буён эса камида 40 киши чўкиб ҳалок бўлган.
Тўхтатилган реакторлар Париж шимолидаги Сена дарёси ва Лион яқинидаги Рона дарёси соҳилидаги АЭСида жойлашган. Дарё сувининг ҳарорати кўтарилгани учун давлат энергетика компанияси қонун талабига мувофиқ реакторларни тўхтатишга мажбур бўлди. Бу дарёга реакторлардан табиатга зарар етказадиган даражада иссиқ сув чиқарилишининг олдини олишга қаратилган.
Атом электр станциялари реакторларни совитиш учун дарё сувидан фойдаланади. Совитилганидан кейин сув яна дарёга қайтарилади, аммо у аввалгидан бир неча даража иссиқроқ бўлади. Жазирама кунларда дарёлар ҳам қизиб кетгани учун станциялар ишлаб чиқариш ҳажмини қисқартиради ёки вақтинча тўхтатади. Шунингдек, бу ишлар сувдаги ўсимлик ҳамда ҳайвонот дунёсини ҳимоя қилиш учун амалга оширилган.
Душанба куни Франция жануби-ғарбидаги Гаронна дарёси бўйида жойлашган Гольфеш АЭСида ҳам бир реактор тўхтатилди. Шунингдек, бошқа бир қатор атом станцияларида ҳам электр ишлаб чиқариш қисқартирилган. Ўтган йили Франция электр энергиясининг қарийб 70 фоизи айнан атом станцияларида ишлаб чиқарилган. Шунга қарамай, Франция электр тармоғи оператори мамлакатда аҳолини электр энергияси билан таъминлаш учун етарли қувват мавжудлигини, айрим реакторлар тўхтатилса ҳам таъминотда муаммо бўлмаслигини билдирди.
Франциянинг 96 департаментидан ярмидан кўпида ҳаёт учун хавфли деб баҳоланган қизил даражадаги огоҳлантириш эълон қилинди. Франция миллий метеорология хизмати маълумотига кўра, 23 июнь 1947 йилдан бери кузатилган энг иссиқ кун бўлди.
Иссиқлик тўлқини фақат Франция билан чекланмаяпти. Германия, Испания, Португалия ва Швейцарияда ҳам кучли жазирама кутилмоқда. Айрим жойларда юзлаб мактаблар ёпилмоқда ёки дарслар қисқартирилмоқда. Париж ва Брюсселда поездлар ҳаракати ҳам техник носозликларнинг олдини олиш мақсадида чекланди.
<iframe width="640" height="420" src="https://www.youtube.com/embed/DAtdlmstLTE" title="Fransiyada issiq sabab atom reaktorlari to‘xtatildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe> Кенжа Бекжонов, Улуғбек Тўхтаев (видео), ЎзА
