Россия ва Шимолий Корея ўртасида янги кўприк қурилди (+видео)
7сентябрь куни Россиянинг Приморье ўлкасида, Россия ва Шимолий Корея чегарасидаги дарё устига қурилган автомобиль кўпригида ҳаракат бошлангани ҳақида Россия ахборот агентликлари хабар берди.
Приморье ўлкасида, Россия ва Шимолий Кореяни боғлаб турувчи темирйўл кўприги бор эди. Янги автомобиль кўприги эса ундан атиги бир неча юз метр узоқликда қурилиб ишга туширилди.
Бироқ бу лойиҳа Россиядан минглаб километр узоқликда жойлашган Киевда хавотир уйғотди. Украина расмийларининг хавотири шундан иборатки, Москва янги кўприкдан нафақат товар ташиш учун, балки, Шимолий Корея ҳарбийларини Украинадаги уруш ҳудудига яширин равишда олиб ўтиш учун ҳам фойдаланиши мумкин.
Россия транспорт вазири Андрей Никитиннинг айтишича: «Кўприкнинг очилиши икки томонлама савдони ривожлантириш, логистикани яхшилаш, маданий алоқаларни мустаҳкамлаш ва чегара ҳудудларини жадал ривожланаётган иқтисодий марказларга айлантиришга ёрдам беради».
Американинг Стратегик ва халқаро тадқиқотлар маркази таҳлилчилари эса Россия ва Шимолий Корея ўртасидаги савдо алоқалари кенгайиб бораётганини таъкидлайди. Уларнинг фикрича, автомобиль кўприги қурилишининг жуда тез суръатларда олиб борилиши, шунингдек, аввал деярли фойдаланилмаган темирйўл саралаш станцияларида ҳаракатнинг юқори даражада сақланиб қолиши Россия ва Шимолий Корея ўртасидаги савдо аҳамияти ошиб бораётганини кўрсатади. Бу жараён Россия Украинага қарши давом этаётган уруши даврида кечмоқда. Бироқ Британиянинг The Guardian газетаси ёзишича, ушбу лойиҳа аслида фақат фуқаролик ва иқтисодий мақсадларда қурилганига шубҳа қилиш учун жиддий асослар бор. Расмий маълумотларга кўра, 2024 йилда Россия ва Шимолий Корея ўртасидаги савдо ҳажми атиги 34 миллион доллар бўлган. Янги кўприк ва унинг атрофидаги инфратузилманинг ўзи эса тахминан 100 миллион долларга баҳоланмоқда.
Лойиҳани кузатаётган украиналик ҳуқуқ ҳимоячилари бу кўприк туризмни кескин ривожлантиришига ишонмайди. Кўприк Москвадан автомобильда 125 соатлик, Владивостокдан эса 4 соатлик масофада жойлашган. Шу сабабли таҳлилчилар кўприк қурилишининг асл мақсади ҳарбий ҳамкорликни янада чуқурлаштириш бўлиши мумкин, деган хулосага келмоқда.
Уларнинг фикрича, бу ҳамкорлик, биринчи навбатда, Шимолий Корея ҳарбийлари ва қурол-яроғини Украинага қарши урушда фойдаланиш учун Россияга олиб ўтишни ўз ичига олиши мумкин.
Бир неча кун олдин Украина президенти Володимир Зеленский Украинага қарши жангларда иштирок этиш учун Россияга 30 минггача шимолий кореялик ҳарбий олиб келиниши мумкинлигидан огоҳлантирди. Унинг таъкидлашича, янги автомобиль кўприги Россиядан Шимолий Кореяга турли юкларни кузатиб бўлмайдиган тарзда ташиш имконини бериши мумкин.
Бундан ташқари, баъзи сиёсатчилар Шимолий Корея Москвага ёрдами эвазига Россиянинг ядровий технологияларини олаётган бўлиши мумкин, деган тахминни айтмоқда.
<iframe width="650" height="420" src="https://www.youtube.com/embed/hE7dBbbdS1o" title="Rossiya va Shimoliy Koreya o‘rtasida yangi ko‘prik qurildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
