Қўшимча техникаларга эҳтиёжи бор тадбиркорлар учун янги имкониятлар

Мамлакатимизда тадбиркорлик фаолиятини қўллаб-қувватлаш, молиявий хизматлардан фойдаланиш имкониятларини кенгайтириш ҳамда лизинг бозорини ривожлантиришга алоҳида эътибор қаратилмоқда.

Бу борада якка тартибдаги тадбиркорларнинг лизинг хизматларидан фойдаланиш имкониятларини ошириш, лизинг муносабатларини ҳуқуқий жиҳатдан аниқ тартибга солиш ва шартнома шартларининг шаффофлигини таъминлаш муҳим аҳамият касб этади.

Бугун Олий Мажлис Қонунчилик палатасидаги ЎзЛиДеП фракциясининг навбатдаги йиғилишида муҳокама қилинган “Лизинг тўғрисида”ги Ўзбекистон Республикаси Қонунига қўшимча ва ўзгартиришлар киритиш ҳақида”ги қонун лойиҳаси айни шу мақсадларга қаратилган.

Қайд этилганидек, ушбу қонун лойиҳасида якка тартибдаги тадбиркорлар лизинг олувчи бўлган ҳолларда лизинг объектини ҳисобга олишнинг ўзига хос хусусиятлари, лизинг шартномаси доирасида объектга бўлган ҳуқуқларни амалга ошириш тартиби, амортизацияни қўллаш ҳамда лизинг объектидан фойдаланишдаги чекловларга оид шартлар белгиланмоқда.

Таъкидланганидек, мазкур қонун лойиҳаси ўз ишини йўлга қўйган, лекин фаолиятини кенгайтириш учун қўшимча техника, ускуна ёки транспорт воситасига эҳтиёж сезаётган тадбиркорлар учун янги имкониятлар яратади. Эндиликда якка тартибдаги тадбиркорлар ҳам лизингдан фойдаланишда юридик шахслар каби ҳуқуққа эга бўлишлари мумкин.

Шунингдек, лойиҳада лизинг объектига бўлган эгалик қилиш, ундан фойдаланиш ва уни тасарруф этиш ҳуқуқларини амалга ошириш тартиби ҳам аниқ белгиланмоқда.

Муҳокамаларда фракция аъзолари лойиҳадаги нормалар якка тартибдаги тадбиркорлар учун лизинг хизматларидан фойдаланишнинг ҳуқуқий асосларини такомиллаштириш, шартномавий муносабатларда аниқлик ва шаффофликни таъминлаш ҳамда тадбиркорларнинг молиявий имкониятларини кенгайтиришга хизмат қилишини алоҳида қайд этди.

М.Комилова,

ЎзА