Президент Алиев: Озарбайжон ва Марказий Осиё мамлакатлари ягона геосиёсий минтақага айланди
Марказий Осиё мамлакатлари билан муносабатлар Озарбайжон ташқи сиёсатининг устувор йўналиши ҳисобланади. Президент Илҳом Алиев Марказий Осиё мамлакатлари ва Озарбайжон раҳбарларининг норасмий учрашувида сўзлаган нутқида шундай баёнот берди.
У 2023 йил бошидан бери минтақага 16 бор, Марказий Осиё етакчилари эса Озарбайжонга 26 марта ташриф буюрганини таъкидлади.
– Бу маълумот икки ва кўп томонлама муносабат жадал ривожланаётгани ва ўзаро яқинлигимизни яққол намойиш этмоқда, – таъкидлади Алиев. – Бугунги кунда Марказий Осиё ва Озарбайжон аллақачон ягона геосиёсий ва геоиқтисодий минтақага айланган.
Етакчи ушбу форматнинг тўлақонли аъзоси сифатида биринчи марта Маслаҳат учрашувида иштирок этаётганини таъкидлаб, Озарбайжон Марказий Осиё мамлакатлари билан ҳамкорликни янада мустаҳкамлашга содиқлигини қўшимча қилди.
С.Раҳимов, ЎзА
