Патент вакилларининг ҳуқуқлари кенгайтирилмоқда
Бугунги рақамли даврда интеллектуал мулк объектларини ҳимоя қилиш, интеллектуал мулк эгаларининг муаллифлик ҳуқуқларини таъминлаш долзарблашиб бормоқда. Қонунчилик палатасининг мажлисида интеллектуал мулк объектларининг фуқаролик муомаласидаги айланмасини ошириш ҳамда патент вакилларининг ҳуқуқларини кенгайтиришга қаратилган қонун лойиҳаси кўриб чиқилди.
Ушбу ҳужжат мамлакатда интеллектуал мулк соҳасида кўрсатиладиган давлат хизматлари сифатини янада ошириш, интеллектуал мулк объектларини фаол фуқаролик муомаласига киритиш, патент вакилларининг ҳуқуқ ва ваколатларини кенгайтиришга қаратилган.
Қонун лойиҳаси билан интеллектуал мулк гаровида унга доир мулкий ҳуқуқларнинг бекор қилиниши ёки қийматининг пасайиши билан боғлиқ ҳуқуқий муносабатлар аниқ тартибга солинмоқда. Қолаверса, патент вакилларининг интеллектуал мулкка оид ишлар бўйича судларда шартнома асосида (ихтиёрий) вакил сифатида иштирок этиши мумкинлиги белгиланмоқда.
Шунингдек, давлат хизматлари марказлари орқали интеллектуал мулк объектларини рўйхатдан ўтказиш учун талабномалар топшириш имконияти ҳам яратилмоқда. Бу эса интеллектуал мулкни рўйхатдан ўтказиш жараёнини аҳоли, тадбиркорлар учун содда ва қулай қилишга хизмат қилади.
Қонун лойиҳасидаги нормалар интеллектуал мулк объектларини рўйхатдан ўтказиш жараёнини соддалаштиришга, уларнинг мулкий ҳуқуқларидан гаров сифатида фойдаланиш имкониятларини оширишга хизмат қилади.
М.Комилова,
ЎзА
