Өзбекстан мен АҚШ суару жүйелерін жаңғырту мәселелерін талқылады
Самарқанд қаласында АҚШ Мемлекеттік хатшысы Марко Рубио бастаған делегацияның Өзбекстанға ресми сапары аясында екіжақты ынтымақтастықты дамытуға бағытталған кездесулер өтіп жатыр.
Осы сапар шеңберінде Өзбекстан Республикасы Ауыл шаруашылығы министрінің кеңесшісі Нуриддин Қушназаров «Valmont Industries» компаниясының ТМД елдері мен Түркия бойынша коммерциялық директоры Сергей Стефановпен және компания өкілі Саидибрахим Эшхужаевпен кездесті.
Кездесуде суару жүйелерін механикаландыру, су үнемдеу технологияларын енгізу және су ресурстарын ұтымды пайдалану мәселелері талқыланды.
Сонымен қатар Өзбекстан аймақтарында механикаландырылған суару жүйелерін кеңейту, қолданыстағы инфрақұрылымды жаңғырту және бірлескен жобаларды жүзеге асыру мүмкіндіктері қарастырылды.
Мұндай кездесулер ауыл шаруашылығына озық технологияларды енгізуге, суару жүйелерінің тиімділігін арттыруға және Өзбекстан мен АҚШ іскер топтары арасындағы практикалық ынтымақтастықты нығайтуға жол ашады.
