Ўзбекистоннинг Парламентлараро иттифоқ фаолиятидаги иштирокига юксак баҳо берилди
Ўзбекистон делегацияси Парламентлараро иттифоқнинг 153-ассамблеяси доирасида парламентлараро алоқаларни янада ривожлантириш ҳамда ҳамкорликнинг келгуси шаклларини мувофиқлаштиришга қаратилган икки томонлама учрашувлар ўтказди.
Ўзбекистон Республикаси Олий Мажлиси Сенати Раиси Танзила Норбоева ва Парламентлараро иттифоқнинг янги сайланган Президенти, Австралия парламенти Вакиллар палатаси Спикери Милтон Дик учрашувида Ўзбекистон ва Иттифоқ ўртасидаги 2026 - 2029 йилларга мўлжалланган ҳамкорликнинг устувор йўналишлари муҳокама қилинди.
М.Дик Ўзбекистоннинг Иттифоқ фаолиятидаги иштирокига юксак баҳо бериб, мамлакат раҳбариятининг парламентлараро мулоқотни мустаҳкамлашга қаратаётган эътибори, бу борадаги изчил сиёсати муҳим аҳамиятга эга эканини алоҳида таъкидлади.
2025 йил апрель ойида Тошкентда бўлиб ўтган Парламентлараро иттифоқнинг 150-юбилей ассамблеяси ҳамда 2026 йил сентябрь ойида Самарқандда ўтказилган Ёш парламент аъзоларининг XII Глобал конференцияси юксак савияда ташкил этилганини эътироф этди.
Арушадаги Ассамблея тадбирлари доирасида намойиш этилган Ёш парламентарийларнинг XII Глобал конференцияси ҳақидаги видеороликка ижобий баҳо бериб, Самарқанд конференцияси амалий натижаларга бой бўлгани билан аҳамият касб этганини қайд этди.
М.Дик келгуси ҳамкорликнинг устувор йўналишларини белгилаш ҳамда Ўзбекистон ташаббусларини Парламентлараро иттифоқнинг 2026 - 2029 йилларга мўлжалланган ҳаракатлар режасига киритиш масаласини муҳокама қилиш мақсадида яқин вақт ичида ўзбек томони билан онлайн учрашув ўтказишни таклиф қилди.
Мазкур мулоқот мамлакатимиз ташаббуслари ва уларни Иттифоқ доирасида илгари суриш механизмларини атрофлича кўриб чиқиш имконини беради.
Милтон Дик Олий Мажлис билан парламентлараро алоқаларни янада мустаҳкамлаш ҳамда Ўзбекистон ва Австралия ўртасидаги икки томонлама ҳамкорликни ривожлантиришдан манфаатдор эканини билдирди.
Норгул Абдураимова, ЎзА
