Ўзбекистоннинг барча ҳудудларида кўп функционал инклюзив ресурс мактаблари очилади
Президентимиз Шавкат Мирзиёев Ўқитувчи ва мураббийлар куни арафасида «Янги Ўзбекистон» университетида устоз ва мураббийлар билан учрашув ўтказмоқда.
Икки йилда инклюзив муҳит яратилган мактаблар сони 729 тадан 3 минг 591 тага, яъни қарийб беш баробарга ошди.
– Бугун тенгдошлари қаторида тўлақонли муҳитда таълим олаётган алоҳида эҳтиёжга эга 10 минг боланинг қувончини сўз билан таърифлаб бўладими? – деди Президентимиз.
Давлатимиз раҳбари алоҳида ғамхўрликка муҳтож фарзандлар доимий эътиборда бўлишини таъкидлади.
Яқинда Тошкент шаҳрида кўп функционал инклюзив ресурс мактаби иш бошлади. У ерда кўриш, эшитиш ёки ҳаракатланишида нуқсони бўлган, шунингдек, руҳий ривожланишда қўшимча ёрдамга муҳтож болалар соғлом тенгдошлари билан бир муҳитда ўқиб, тарбия олади.
Бундай мактаблар йил охиригача Хоразм, Жиззах ва Самарқанд вилоятларида, келгуси икки йилда эса барча ҳудудларда очилади.
ЎзА
