Ўзбекистонда инновацион лойиҳаларга катта сармоя ажратилади (+видео)

Рақамли технологиялар вазирлигининг конгресс залида "Powering the Startup Ecosystem" кенг кўламли тадбири бўлиб ўтди.

Унда мамлакатимизда стартап экотизимини янада ривожлантириш, ёш дастурчилар ва технологик тадбиркорларни қўллаб-қувватлашга қаратилган муҳим янгиликлар эълон қилинди.

Тадбир доирасида IT Park Uzbekistan мамлакатдаги энг йирик технологик танлов —"President Tech Award"нинг янги мавсуми ва сунъий интеллект соҳасига ихтисослашган янги миллий танлов — "President AI Award" старт олганини маълум қилди.

Маълум қилинишича, “President Tech Award”нинг бу йилги мукофот жамғармаси сезиларли даражада оширилиб, 1 миллион доллардан 5 миллион долларга етказилди. Ушбу маблағнинг бир қисми энг яхши лойиҳалар учун грант сифатида ажратилса, қолган қисми истиқболли стартапларни кенгайтириш ва ривожлантириш учун инвестиция сифатида йўналтирилади.

Шунингдек, Ўзбекистонда илк бор сунъий интеллект технологияларига бағишланган "President AI Award" танлови ҳам йўлга қўйилди. Мазкур танлов давлат бошқаруви, саноат, тиббиёт, таълим ва “яшил” иқтисодиёт каби муҳим соҳалар учун амалий ечимлар яратаётган стартапларни қўллаб-қувватлашга қаратилган.

[gallery-30171]

Таъкидланишича, ҳар икки танлов ҳам маҳаллий стартаплар учун нафақат молиявий кўмак, балки халқаро экспертлар билан ишлаш, инвесторларга чиқиш ва глобал бозорга кириш имкониятларини ҳам тақдим этади.

Мутахассислар фикрича, бу ташаббуслар Ўзбекистонда рақамли иқтисодиётни жадал ривожлантириш ва жаҳон бозорида рақобатлаша оладиган янги авлод технологик компанияларини шакллантиришда муҳим қадам бўлади.

<iframe width="650" height="420" src="https://www.youtube.com/embed/mDOBTyD7XAQ" title="O‘zbekistonda innovatsion loyihalarga katta sarmoya ajratiladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нигора Раҳмонова,

С.Обиджонов (монтаж), ЎзА