Ўзбекистон — Эрон: икки терма жамоа таркибидаги юлдузлар ва энг қиммат футболчилар
24-сентябрь куни Ўзбекистон миллий терма жамоаси Фарғонада "Истиқлол" стадионида Эрон билан халқаро ўртоқлик учрашувини ўтказади. Баҳс олдидан ҳар икки жамоа таркибидаги таниқли футболчилар алоҳида эътибор марказида.
Ўзбекистоннинг энг қиммат футболчиси — Абдуқодир Ҳусанов. “Манчестер Сити” ҳимоячисининг бозор қиймати сўнгги эълон қилинган Трансфермаркет маълумотларида 35 миллион евро атрофида баҳоланган. Шу тариқа, Ҳусанов нафақат Ўзбекистон, балки Марказий Осиёнинг энг қиммат футболчиларидан бири ҳисобланади.
Фабио Каннаваро йиғинга Ҳусанов билан бирга терма жамоанинг яна бир қатор етакчиларини чақирган. Элдор Шомуродов ва Аббосбек Файзуллаев ҳам таркибнинг асосий юлдузлари саналади. Май ойидаги Трансфермаркт баҳоларида ҳар икки футболчининг қиймати 7 миллион евродан кўрсатилган. Шомуродов ва Файзуллаев ҳозир Туркиянинг “Истанбул Бошакшеҳир” клубида, Ҳусанов эса Англиянинг “Манчестер Сити” жамоасида фаолият олиб бормоқда.
Ўзбекистоннинг 32 футболчидан иборат ушбу йиғин таркибида Европада ўйнаётган ёшлар ҳам бор. Швейцариянинг “Лугано” клубидан Беҳруз Каримов, Россиянинг “Рубин” жамоасидан Жаҳонгир Ўрозов, Белгиянинг “Антверпен” клубидан Муҳаммадали Ўринбоев терма жамоага жалб этилган.
Эрон ҳам Фарғонага тажрибали ҳужумчилари билан келмоқда. Амир Ғаленойи хорижда тўп сурадиган саккиз футболчини якуний таркибга қўшган. Улар орасида Эрон футболининг икки катта юлдузи — Меҳди Тареми ва Сердар Азмун бор. Тареми “Ал-Васл”, Азмун эса “Шабаб Ал-Аҳли” шарафини ҳимоя қилмоқда.
Тареми Эрон сафида 108 учрашувда 60 гол, Азмун эса 91 ўйинда 57 гол қайд этган. Демак, икки ҳужумчининг терма жамоадаги умумий кўрсаткичи 117 та голни ташкил қилади. Бу жуфтлик Ўзбекистон ҳимояси учун асосий хавф манбаларидан бири бўлиши мумкин.
Эрон таркибида Европа клублари вакиллари ҳам мавжуд. Моҳаммад Моҳеби Хорватиянинг “Риека”, Деннис Экерт Белгиянинг “Стандард”, Шаҳаб Заҳеди эса Малайзиянинг “Жоҳор Дарул Таъзим” клубидан чақирилган. Саман Годдос ва Алиреза Жаҳонбахш эса бу йиғинда иштирок этмайди.
Ўзбек ва жаҳон спортига оид энг сўнгги янгиликлар: @Uzasport
