Ўзаро ҳамкорликнинг янги босқичи

Ўзбекистон Республикаси Президенти Шавкат Мирзиёевнинг Туркманистонга амалга оширган ташрифи мамлакатларимиз ўртасидаги дўстлик, яхши қўшничилик ва стратегик шериклик муносабатларини янада мустаҳкамлаш йўлидаги муҳим қадам бўлди.

Бугунги мураккаб халқаро шароитда давлатлар ўртасидаги ўзаро ишонч ва ҳамжиҳатликнинг аҳамияти тобора ортиб бормоқда. Шу жиҳатдан, Ўзбекистон ва Туркманистоннинг барча соҳаларда ўзаро манфаатли ҳамкорликни ривожлантиришга интилиши нафақат икки мамлакат, балки бутун Марказий Осиё минтақаси барқарорлиги ва тараққиёти учун ҳам муҳим аҳамиятга эга.

Мамлакатларимизни муштарак тарих, яқин маданият, қадриятлар ва анъаналар бирлаштириб туради. Бугун ана шу тарихий яқинлик иқтисодий ҳамкорлик, савдо алоқалари, транспорт, энергетика ва экология йўналишларидаги амалий шериклик билан янада мустаҳкамланмоқда. Ташриф давомида эришилган келишувлар ҳам ўзаро ҳамкорликни янги босқичга олиб чиқиш учун муҳим имкониятлар яратади.

Айниқса, савдо-иқтисодий алоқаларни кенгайтириш, қўшма лойиҳаларни амалга ошириш, тадбиркорлар ўртасидаги ҳамкорликни ривожлантириш ва транспорт йўлаклари имкониятларидан самарали фойдаланиш масалалари алоҳида аҳамиятга эга. Чунки бундай ҳамкорликнинг ҳақиқий натижаси янги иш ўринлари, иқтисодий фаоллик ва аҳоли фаровонлигининг ошишида намоён бўлади.

Ташриф доирасидаги минтақавий учрашувлар эса давлатлар ўртасида очиқ мулоқот ва умумий манфаатларга асосланган ҳамкорликни ривожлантиришга хизмат қилади. Хусусан, сув ресурсларидан оқилона фойдаланиш, экологик муаммоларни ҳал этиш, энергетика хавфсизлигини таъминлаш ва замонавий транспорт тизимларини ривожлантириш каби масалалар Марказий Осиё давлатларининг биргаликдаги саъй-ҳаракатларини талаб этади.

Ўзбекистон ва Туркманистон ўртасидаги ҳамкорликнинг изчил ривожланиши халқларимиз манфаатларига хизмат қилади. Эндиликда асосий вазифа эришилган келишувларни ҳаётга татбиқ этиш, янги имкониятлардан самарали фойдаланиш ва ўзаро шерикликни амалий натижалар билан мустаҳкамлашдир.

Шанжарбай Қалмуратов,
Халқ депутатлари Нукус тумани Кенгаши депутати

ЎзА